| Sir Richard Branson di Carbon War Room: Ta un privilegio pa ta riba mesun escenario cu Prome Minister Eman |
 |
 |
| Thursday, 21 June 2012 09:14 | ||||||
 “Ta un honor pa ta riba un scenario cu figuranan cu a haci asina hopi pa salba mundo. Y un honor pa comparti scenario cu Prome Minister di Aruba,” tabata e prome palabranan expresa door di Sir Richard Branson, ora cu a yega su turno pa hiba palabra durante un di e sesionnan di e Conferencia di Rio +20, caminda e isla y nacionnan chikito a reuni. Sir Richard Branson a recorda cu e tabata di bishita na Aruba aña pasa, pa e plan di re-introduci flamingonan den Caribe, y a keda masha encanta cu e trato cu el a ricibi. El a splica cu na momento cu Carbon War Room a wordo lanta na final di 2009, el a wordo haci cu e meta pa trata di traha cu industria, ciudad y nacionnan, crea formanan pa saca carbon for di diferente sector. El a splica cu basicamente loke mester wordo haci ta, saca 17 gigaton di carbon for di atmosfera pa trece un balans. Si solamente yega na un consensus entre e ciudadnan di mundo, ya caba ta saca 6 gigaton di carbon di emision for di aire, y si logra cu paisnan di mundo, e ta un otro 2 gigaton di carbon menos. E ariba menciona, el a splica, ta e meta pa cual Carbon War Room a wordo lanta, y pa logra cu pa aña 2020 tin un isla grandi, manera Aruba, cu ta 100% liber di carbon su emision. “Si Aruba por haci'e, e otro islanan na mundo tambe lo por haci esaki,” Branson a duna di conoce. Sin embargo e ta bisa cu den esaki tin un reto. Tin un isla cerca di Aruba cu tambe ta riba e ruta aki, esta Virgin Island. Despues el a pasa pa menciona proximo conferencianan cu lo bay tin na Aruba cu lidernan di islanan den Caribe pa papia riba e temanan aki y crea reservanan berde rond di Caribe. “Mi ta spera cu Carbon War Room hunto cu Prome Minister Eman nos lo por sinta papia cu resto di Caribe y trata di logra yega na carbon-neutro na mesun momento. “Caribe ta un parti masha bunita di mundo y mi ta privilegia di por biba eynan. E lo ta maraviyoso si nos no tin e tankeronan grandi ta yega e islanan chikito cu e fuel mas costoso di mundo. E placa aki por wordo gasta na cosnan mas miho,” el a expresa. Na final Sir Richard Branson a bisa di ta contento di e asociacion cu Aruba.
|
Mustra/Kita e formulario di comentario
