Bishita di miembronan di Parlamento na Fundacion Cas pa Comunidad Arubano

Thursday, 21 June 2012 20:23

Diahuebs mainta, miembronan di Parlamento cu ta forma parti di e comision “Volkshuisvesting, Ruimtelijke ontwikkeling en Milieu, presidi pa drs. Marisol Lopez Tromp, ariba peticion di e comision, a hasi un bishita na FCCA.

Esaki den cuadro di nan trabou den e comision pa asina pa haya mas infomacion di e proyectonan di vivienda, e trabounan cu FCCA ta hasi den e barionan y e proyectonan di vivienda nobo cu ta andando. Conhuntamente cu e director di FCCA sr. Peter van Poppel, miembro di Hunta di Directiva di FCCA sr. Oduber y trahadornan di FCCA, e miembronan di parlamento, sra. Marisol Lopez Tromp, sra. Lorna Varlack, sr. Chris Dammers, sra. Mervin Wyatt Ras, sr. Donny Rasmijn y sra. Desiree Croes a hasi bishita na Juana Morto Complex pa mira con e trabounan di renovacion ta avanzando. Durante e recorido a pasa den e proyecto di vivienda na Palisiaweg. Tambe nan por a observa for di den e bus e inicio di e cas modelo na Diamantbergweg. A drenta den e bario di Cura Cabay Zuid unda por a mira e proyecto di plantamento di mata cu FCCA a hasi conhuntamente cu e ministerio di Asuntonan General y e Plan Bo Bario y Santa Rosa. Despues a hasi un parada na e cas di cuido di nos grandinan na Cura Cabay, antes e cas di Ho Sing Loy, cual cas ta wordo maneha pa e fundacion” Centro di Cuido y Alegria pa nos Grandinan”. Cu e bishita aki FCCA kier a ilustra con casnan grandi ta wordo converti den espacio pa por wordo usa pa cuido di nos grandinan, cual e peticion ta grandi. Alabez e miembronan di Parlamento a haya e oportunidad di observa di serca con e empleadonan di e fundacion ta eherce nan trabou cu amor y e poco recurso cu nan tin dunado nos grandinan e cuido diario. A sigui e recorido door di e viviendanan na Jaburibari, unda FCCA a splica con esakinan ta parti den varios categoria, huur, compra, cas pa e hende mas grandi, senioren, y pa e cuidadano cu limitacion. Por ultimo a hasi un parada na e proyecto di vivienda na Paradera. Aki e miembronan di Parlamento a keda impresiona cu un proyecto di 20 vivienda cu ta destina pa personan riba 55 anja. A termina e recorido na oficina principal di FCCA na Sabana Blanco, unda e miembronan di Parlamento a gradici e director di FCCA sr. van Poppel y su team pa e informacionnan valioso cu nan a recibi.

Comentarionan (1)

Mustra/Kita comentarionan

...

Casi 3 anja despues Avp a lanta of spierta foi di sonjo, awor cu campanja 2013 ta jegando awor tin mas shownan ta andando cu parlamentario nan pa sigie ganja nos pober pueblo ! Ta kiko mas Avp kier sigie ganja ?> smilies/sad.gif