Arubano residencia na Hulanda a celebra San Juan na Tilburg

Tuesday, 26 June 2012 12:31

E comunidad Arubano na Hulanda a celebra diadomingo 24 di juni Dia di San Juan den Boerke Mutsaers na Tilburg. Presente na e ocacion aki tabata directora suplente di Cas di Aruba sra. Shandra John, miembronan di Nos Baranca y un publico grandi di Arubianonan cu a bin presencia e evento cultural aki.

E festival cultural a wordo habri oficialmente pa Michelle Thijssen, ganadora di e Festival di Dera Gai na anja 2011, cantando nos himno nacional ‘Aruba Dushi Tera’.

Presidente di Nos Baranca - cu ta organisa e Festival - sra. Mena Maduro a hiba palabra unda ela gradici tur esnan cu a contribui na e celebracion aki. En especial e tabata tin un danki grandi na Cas di Aruba, cu tur aña ta sostene e Festival di San Juan cu subsidio.

Directora suplente di Cas di Aruba sra. Shandra John a disculpa Minister Plenipotenciario sr. Edwin Abath, kende no por tabata presente pa motibo di otro compromiso. Sra John durante su discurso a bisa: “Awe e comunidad Arubano residencia na Hulanda un vez mas ta celebra Dia di San Juan y Festival di Dera Gai. Dia di San Juan y Festival di Dera Gai, mescos cu Dande y Carnaval ta un di e fiestanan central di e cultura Arubiano. Ta di aprecia y admira e bunita trabao di Nos Baranca cu tur aña ta organisa e Festival di San Juan/ Dera Gai y di e manera aki ta contribui pa e Arubianonan residencia aki na Hulanda por sinti nan mes na cas. Pa chiquito cu e evento por ta, e tin su importancia grandi bou di nos hendenan. Cas di Aruba tambe ta mira e importancia den e evento aki y ta pesey ya pa añanan ta contribui na subsidia e Festival di San Juan y lo sigi haci esaki pa mantencion di nos cultura bou di nos hendenan aki na Hulanda.”

Na final sra. John a termina su discurso gradiciendo directiva y voluntarionan di Fundasion Nos Barnaca pa nan bunita trabou y deseando tur 7 participante hopi exito.

Miro Ridderstaat a bira e ganador abosoluto di e Festival di San Juan/ Dera Gai 2012 aki. Presidente di Fundacion Nos Baranca sra. Mena Maduro a haci entrega di e copa na e ganador. Na di dos lugar a keda Maria Ridderstaat y Luis Figaroa a termina na di tres lugar.

Banda di e shete participantenan na e Festival, tambe tabata tin canto, baile y algun actividadnan pa e publico, entre otro competencia di baile di San Juan, competencia di ranca bandera y competencia di mata e Gai. Manera custumber e celebracion aki tabata uno ameno y netamente Arubiano.