| Sra. Jeanette Richardson-Baars ta haya reconocimento di Prome Minister Eman |
 |
 |
| Wednesday, 27 June 2012 16:05 |
 Durante su discurso na e prome simposio di Reino den Centre for Innovation Edward Cheung Prome Minister Eman a dedica atencion special na e logro di sra. Jeanette Richardson-Baars y e reconocimento importante cu el a ricibi di sra.Hillary Clinton.
Eman a bisa un bes mas cu e cambio den pensamento di e relacion dentro di Reino ta dificil pa wordo realisa. Dentro di Reino nos tin que ver cu percepcionnan negativo di ambos banda y riba e percepcionnan aki un desconfiansa profundo a wordo crea. Aki ta unda e cambio mester bin. Pa esaki ideanan concreto a wordo formula cu lo wordo discuti den Reino. Aunke cu no semper politica ta crea e percepcionnan negativo aki. Eman a relata aki na un articulo cu a sali den prensa Hulandes cu ta bisa cu tin indicacion cu Aruba y Corsou ta destinacionnan na unda hende homber y muhe ta wordo obliga pa bay den prostitucion. Segun ANP e noticia aki a bin for di un rapport di Asuntonan Exterior Mericano riba traficacion di hende. Un comunicado asina ta pas perfectamente den e percepcion negativo. Eman “Loke lamentablemente no a wordo poni den e noticia aki ta cu segun gobierno Mericano Aruba netamente ta cana dilanti den e lucha contra traficacion di hende. Cu esaki ta motibo pa e Minister Mericano di Asuntonan Exterior sra. Hillary Clinton pa personalmente entrega un reconocimento na sra. Jeanette Richardson-Baars pa e tremendo trabou cu e y su team ta haciendo pa e comunidad di Aruba y pa humanidad henter riba tereno di traficacion di hende”. “Jeanette, nos Jeanette ta un di e dies personanan cu a wordo poni como ehempel pa tur pais na mundo con efectivamente por combati traficacion di hende”, Eman cu masha orguyo a bisa. Sra.Richardson-Baars a ricibi despues un reconocimento di gobierno di Aruba for di Prome Minister Eman hunto cu un bouquet di flor. Un gesto cu a wordo hopi aprecia, tanto pa sra. Richardson-Baars mes como pa e publico presente cu a balora esaki cu un aplauso grandi.
|
Mustra/Kita e formulario di comentario
