| 19 di juni ta un dia historico pa cuerpo di Douane y sigur pa sindicato SADA |
 |
 |
| Wednesday, 27 June 2012 21:05 |
|
E resultado di e 2 enquetenan cu SADA a jega di tene tabata bon cla! LOSKOPPELING nos tur kier. Un LOSKOPPELING hunto cu un REORGANISASHON. Tur parti di mundo Douane ta un cuerpo RESPETA. I aki na Aruba e no mester ta un excepcion. Un cuerpo cu ta traha no solamente pa jena e caha di gobierno pero pa cuida nos fronteranan y cada un ciudadano cu ta forma parti di nos comunidad. Ta un honor pa nos sirbi nos dushi pais Aruba. Nos cuerpo di Douane a conoce varios cambio durante e ultimo anjanan, pero semper tabata e deseo di nos curason pa para riba nos mes pia, pa ta independiente y por tuma nos mes un decishonan pa bienestar di nos cuerpo I nos pais. Y awe ta e comienso di e proceso di separashon cu lo bai tuma lugar entre nos cuerpo di aduana y nos rumanan di belasting. Nos sa cu e no ta bai ta fasil. Loskoppeling lo bai tuma esfuerso y trabou di kada persona. Pero HUNTO nos lo logra sigur. Awor mas cu nunca SADA ta pidi cooperashon y tambe e boluntad pa juda cu e loskoppeling. Mi mester pone enfasis cu e loskoppeling aki no ta pa directiva di SADA. E loskoppeling ta pa kada douanero cu ta stima y ta orguyoso di nan trabou. Esnan cu a cuminsa cu e lucha, semper a bisami pa no laga e vision di loskoppeling bai perdi. Paso si nos laga otro hendenan cu no ta stima douane y cu no tin e conocemento di nos trabow sigi manda den NOS CAS, aki un paar di anja douane lo no existi mas. Pero nos a keda cu e vision, e curashi I nos ta kere den NOS hendenan I pesey nos a sigi cu e lucha. Dia 1 di januari 2013 nos lo habri un anja nobo caminda cu sigur nos tur lo ta orguyoso di ta forma parti di e cuerpo aki. Ainda nos tin hopi projectonan pa traha ariba dije, manera Asycuda, cual dentro di poco ta bek den cas. Duna bo aporte pa hunto nos logra e cambionan tan anhela. Duna bo mihor no solamente na bo cuerpo pero prinsipalmente na Pais Aruba. Den nos cuerpo tin hopi hende capasita y cu tin e vision y prinsipalmente e curason pa carga cu e cambio grandi aki. Atrobe SADA ta haci un apelashon na boso, UNION TA HASI FORSA. Apesar cu LOSKOPPELING ta un logro sumamente positivo pa cu e cuerpo, no ta tur hende ta wak esaki cu mesun wowo. Pero realidad ta cu e trein di LOSKOPPELING a cuminsa move caba I si bo no subi awor den dje y e bai laga bo e consecuencia ta pa bo mes. Naturalmente mester tin hopi pasenshi y comprenshon ja cu no ta tur hende lo wak e cambio di biaha, pero na final nos tur lo sali beneficia cu E LOSKOPPELING I mas ainda PAIS ARUBA!! Ultimo tempo nos dienst a bai hopi atras pa motibo cu cierto hefenan no tabata tin e vision, curashi y determinacion pa cu nos cuerpo I mucho menos e LOSKOPPELING. Pesey mes nos ta duna Minister di Finanzas danki cu e si a wak e necesidad pa pone mas hende na pia di trabow pero tambe e ta wak e importancia di e hondenteam di Aduana. SADA ta gradici nos Minister di Finanzas imensamente cu semper a sa di duna oido I mustra su interes pa cu nos cuerpo. Tambe nos kier a gradici sr. Nic Quandus, Bernadina y sra Cindy Clark cu a sa di duna su aporte grademente pa cu e realisacion pa cu e logro aki I cu semper tabata disponibel pa cada pregunta I preucupashon cu SADA por tabata tin. Tambe mi no kier lubida esnan cu ta juda nos sindicato tras di Cortina den e proceso di LOSKOPPELING. DANKI un biaha mas, tambe nos kier a pidi disculpa cu nos invitacion no a Sali den medionan di prensa nos no sa unda e fayo tawata pero nos sa na tur e jamadanan cu nos a risibi cu ainda tin ex-colleganan cu ainda tin e cuerpo di douane na pecho. SADA ta spera cu di awe padilanti lo no tin duda mas den ningun di bosonan cu nos loskoppeling ta un HECHO, y cu desde awor ta padilanti so nos ta bai. Direktiva SADA |
Mustra/Kita e formulario di comentario
