DCA a sa di trece su programa escolar di San Juan, ‘Dera Gay’ den un forma dibertido y educativo

Thursday, 28 June 2012 10:26

Departamento di Cultura Aruba (DCA) ta mantene y promove nos Fiesta di Cosecha, San Juan ‘Dera Gay’ na alumnonan di scolnan basico den un forma dibertido y educativo. Henter e siman di 18 pa 22 di juni di e aña aki, DCA, seccion di implementacion, Grupo Cakiña y bailadonan a bishita un total di 11 scol basico. Un total di 2500 alumno a haya informacion y demostracion tocante e baile y nos fiesta di cosecha di San Juan ‘Dera Gay’.

E programa ta consisti di splicacion tocante e historia di San Juan ‘Dera Gay’. Grupo Cakiña ta presenta dos piesa tipico y e piesa di ‘Dera Gay’. Un miembro di Cuerpo di Bombero Arubano a duna splicacion tocante e peligro y prevencion relaciona cu cendemento y huma di candela.

Algo cu e muchanan ta gusta ta e competencia di rancamento di bandera, grito di gay y galiña cu ta un wega pa e muchanan por participa. Caminda ta escoge 6 mucha homber y mucha muhe pa despues escoge ganadornan segun apoyo di e alumnonan di scol. Esaki no ta e parti di historia relaciona cu e fiesta di cosecha. D’ey ta sigui e competencia di e baile di deramento di e gay pa mira kende y con ta baila esaki. Casi na final ta invita un maestra of maestro pa tambe haci e baile di ‘dera gay’. E ganadornan di e competencia a ricibi un certificado for di man di lider di e proyecto di Departamento di Cultura. E muchanan ta gosa masha tanto cu e competencia y dunamento di apoyo na alumnonan di nan klas.

Na final di e programa, lider di e proyecto di DCA y un representante di DCA, den nomber di Departamento di Cultura Aruba ta duna un plakaat na director of representante di cada scol como scol participativo na e Proyecto Escolar San Juan, ‘Dera Gay’ 2012.

Riba ultimo dia di e proyecto Minister di Cultura, Sra. Michelle Hooyboer – Winklaar a bishita scol basico Cacique Macuarima y a felicita e director y ekipo di Departamento di Cultura Aruba cu a realisa e proyecto aki pa nos scolnan basico. Minister Hooyboer – Winklaar tambe a participa y mata e gay.

E muchanan hunto cu maestronan a pasa un momento dibertido y di e forma aki DCA ta mantene y promove nos fiesta di cosecha bou di nos muchanan y atrabes di nan na mayornan. Atrabes di nos medionan di comunicacion e tradicion aki ta yega na henter e pueblo di Aruba.