| Mi Compromiso ta ‘Aruba’. Kico ta bo Compromiso? |
 |
 |
| Friday, 07 September 2012 08:37 |
|
Aruba Tourism Authority tin como tarea principal pa promove Aruba como un destinacion turistico incluyendo tur servicio y producto cu por ta di interes pa nos bishitantenan. Awendia e turista no ta bishita un destinacion solamente pa e bunita beach y e clima pero nan ta buscando ‘experencia’ cu ta enrikece nan y esaki ta wordo brinda pa medio di entre otro nos hendenan. E obhetivo primordial di e campaña ta pa conscientisa e comunidad local incluyendo e socionan den e industria riba e vision y accionnan pa cu Turismo, incluyendo e vision y accionnan carga pa ATA, cual ta inclui comunicacion referente e esencia di e marca ‘Aruba’. E vision di turismo pa Aruba ta enfoca riba un desaroyo sostenibel cual ta significa cu ainda nos ta depende di e cantidad di bishitantenan pero primordialmente e esfuersonan ta dirigi continuamente riba hisa e calidad di e bishitante. Esaki ta significa cu Aruba kier atrae e bishitante di calidad cu ta laga mas atras y asina hisa e contribucion na e GDP pa medio di turismo. Esaki ta conforme e vision di Minister di Turismo, Transporte y labor, Sr. Otmar Oduber. Mester ta consciente cu nos tur ta responsabel pa duna e turista e experencia di felicidad y trankilidad. E programa di certificacion cu a wordo lansa na october ultimo sigur ta un instrumento esencial pa prepara un y tur of refresca conocemento di un y tur, pero principalmente di e industria turistico pa asina nos por dispone di tur e conocemento pa por brinda un miho calidad di servicio conforme expectativa di e bishitante. E campaña aki lo duna un empuhe na e bunita programa aki cu ya caba despues di solamente 11 luna ta un exito total cu mas di 900 persona certifica. Tur esunnan cu a participa ta hopi contento y satisfecho di por a haya e oportunidad di ta parti di esaki. Alabes e campaña aki lo ilustra con Aruba Tourism Authority ta contribuyendo na Aruba su turismo, cual ta e compromiso y responsabilidad cardinal di e organisacion y su empleadonan. E campaña lo duna e audiencia un bista di e tarea di ATA y lo ilustra e dedicacion cu cual empleadonan di nos oficina di Turismo ta carga nan compromiso. Ademas di refleha riba e ekipo di Aruba Tourism Authority tambe lo enfoca riba algun di esunnan cu a wordo reconoci cu un “shoco award” na 2012. Ta trata aki di esunnan cu a sobresali den turismo, specificamente den nan area di trabou. E personanan aki ta sirbi como ehempel debi na nan pasion y compromiso cu nan tin pa cu eleva e experencia di tur nos bishitantenan. Hopi importante tambe ta e parti di nos comunidad, no solamente esun cu ta traha directamente cu e turista pero cada un di nos cu ta biba riba e baranca aki den un manera of otro tin vinculo cu turismo. Durante a campaña lo por mira diferente persona den diferente profesion cu ta contribui na e experencia di nos turistanan. A lansa e etapa nobo di e campaña di conscientisacion cu diferente ‘cara’ cu ta carga e campaña na un manera excelente; Sr. Vicente Kock, trahado di bina local, Sr. Gerrit Griffith ganado di e “Lifetime achievement award 2012” cu ta forma parti di e “shoco award” , y di ATAT Sr. Enty Giel como “Visitor Care Liaison”, Sr. Ricardo Croes como “Trade Relations Liaison” y Sra. Jerusha Rasmijn cu ta manager di “Aruba Convention Bureau”. Tur den nan area di experticio ta carga na compromiso y pasion na curason y ta refleho di locual ATA kier trece dilanti. Aruba ta disfruta di un popularidad asina grandi y di hopi "repeat visitors” cu ta bolbe aña tras aña, mas cu na cualkier otro destinacion den Caribe pero nos mester traha riba mantene e posicion aki y esaki lo ta solamente posibel si cada un di nos duna di nos parti y tin e compromiso cu Aruba, nos isla stima. Durante di e conferencia di prensa anunciando e campaña nobo, Sra. Ronella Tjin Asjoe-Croes CEO di ATA conhuntamente cu Sjeidy Feliciano, Senior PR & Corporate Communication Specialist y Mario Arends, Branding and Advertising Specialist di ATA a elabora riba e campaña y a expresa cu nan ta entusiasma pa cu ehecucion di e proyecto aki. E campaña lo inclui diferente aspectonan interactivo y di comunicacion via plataformanan manera Facebook, television, corantnan y radio. Pueblo di Aruba keda pendiente pa tur loke ta sigui durante e proximo lunanan. Y no lubida cu cada un di nos tin un compromiso cu nos pais, principalmente pa cu nos turismo pero sigur riba e diferente areanan unda nos cada un ta activo. Carga bo compromiso cu amor, dedicacion y pasion. Tocante Aruba Tourism Authority: Aruba Tourism Authority tin como meta pa ta un organisacion di mercadeo innovativo y efectivo cu ta posiciona e marca Aruba como e destinacion turistico di prome nivel, enfocando riba calidad di e experiencia y di turismo pa Aruba. Una bes aki na Aruba, un turista su experiencia ta depende di infrastructura turistico y e interaccion cu nos hendenan. Sea cu e persona en cuestion ta traha den e industria turistico of den cualkier otro ramo, nos tur por tin un impacto positivo riba Aruba su Turismo y bienestar di nos economia y di nos isla. Pa mas informacion subi e website: www.aruba.com of “like” nos riba facebook/oficinaditurismo". Explora Aruba su app.aruba.com |
Mustra/Kita e formulario di comentario
