Homenage na lidernan memey di studiantenan di UA

Tuesday, 11 September 2012 08:51

Un Universidad cu ta resalta ta depende di studiantenan y programanan cu ta resalta y ta di nivel halto. Y pa e motibo aki un biaha mas e Oficina Encarga cu Asuntonan di Studiante di Universidad di Aruba, OSA, a coordina reconocimento na studiantenan y organizacionnan estudiantil cu mas a resalta den e aña academico 2011-2012.

E ceremonia a tuma luga den un aula di Universidad di Aruba completamente yen, no solamente di e studiantenan nomina, pero tambe nan coleganan, docentenan, como tambe Rector di Universidad di Aruba, Dr. Glenn Thode. Minister di Enseñansa Arthur Dowers y Parlamentario Lainda Westerhoff tambe a uni na e grupo.

E anochi tabata pertenece sinembargo na esnan cu a resalta tanto na nivel comunitario y servicio como tambe na nivel academico. E studiantenan cu a resalta pa nan thesis di graduacion tabata Harshita Ludhani pa Facultad di Hospitalidad y Estudio di Maneho den Turismo, FHTMS; Charanjeet Daswani, di Facultad Financiero Economico, FEF, y Chun Luk Ngo kende a gradua cu e punto mas halto den historia di Facultad di Derecho di Universidad di Aruba. Tur tres a keda homenagea no solamente pa nan decanonan tambe, sinembargo a ricibi premionan special di parti di Fondo Famia Malmberg, CATC y oficina di abogado VanEpsKunnemanvanDoorne, respectivamente.

Director Financiero di Universidad di Aruba Patrick Arens di su banda a yama representantenan di e cuater organizacionnan activo na Universidad di Aruba, pa asina expresa gratitud pa nan actividadnan. Ta trata aki di Kiwanis Circle K International, Parlamento Hubenil, Studentenraad Universiteit van Aruba (SUA), y UNIA Magazine, cu ta produci e revista di Universidad di Aruba.

Despues a sigui presentacion di e premionan di Liderazgo di Studiante cu sigur a lanta hopi atencion. E ‘Student Leadership awards’ ta reconoce lidernan memey di studiantenan cu a percura pa hisa e nivel e estudio tanto pa den como pafo di e murayanan di Universidad di Aruba. Liderazgo den forma di accepta un responsabilidad y duna cuenta pa e responsabilidad aki, sa ki ora pa guia y ki ora pa sigui y tin e deseo pa trece cambio positivo tanto den comunidad como na mundo. E nominadonan tur a keda presenta pa e propio studiantenan mes, e facultadnan y e personal, cu despues ta pasa pa un comision di seleccion.

Asina a stipula tres categoria den cua studiantenan a keda nomina, cu ta liderazgo excepcional, servicio na comunidad excepcional y tambe mentor excepcional. Pa a keda nomina e studiatenan mester a demonstra compromiso na e balornan di husticia y interes, actua segun un concepto propio fuerte; pensamento critico y creativo; tuma risiconan voluntariamente; comunica efectivamente; eherce poder apropiadamente; articulo un sentido positivo di direccion; y inspira speranza.

Asina a nombra Presidente di SUA, Suzy Kock como recipiente di e Premio di Liderazgo, pa motibo di su compromiso na e conseho di studiante. E comision di evaluacion a considera cu Kock, kende ademas di ta un studiante di derecho excepcional por balanza su estudio y su actividadnan comunitario, aplicando su abilidadnan como lider den ambos. E ta considera un ehempel hopi positivo na Universidad di Aruba.

David Leer di Facultad di Arte y Sciencia a ricibi e Premio Comunitario pa su empeño pa refleha e orguyo y spirito di Universidad di Aruba den comunidad. E ta considera un activista comunitario, unda e ta traha pa trece speranza pa esnan cu tin mester, y ta traha pa mehora condicionnan pa esnan desprivilegia. Leer ta un miembro di Cuerpo Policial di Aruba y ta un casa y tata dedica. Asina mes e ta hinca hopi esfuerso den su estudio y su comunidad. No tabatin duda den e sala cu Leer lo a ricibi e premio aki.

Concuela Cameron y Monica Karem a wordu hondra cu un premio pa nan talento. Fundashon Donny Lacle tur anja ta duna un reconosimento na studiante cu ta sobresali den nan talento y cu semper ta comparti nan talento na Universiad di Aruba.

Finalmente e Premio pa Miho Mentor a bay pa Cherry Ooft, kende a demostra su capacidad pa pusha otro studiantenan y motiva nan pa sigui dilanti. E abilidad di por mentor ta yuda no solamente e propio studiante academicamente, sino cu e ta motiva otronan tambe y ta inspira nan.

E anochi tabata dirigi riba e studiantenan organiza pa studiantenan, unda tabatin poesia, refleccion y tambe canto. Tanto Minister di Enseñansa Arthur Dowers como Rector Glenn Thode a enfoca riba e balor di studiantenan pa duna un contribucion na sciencia y comunidad, ya cu esaki ta yuda desaroyo di Aruba. Minister Dowers ta aplaudi e iniciativa pa duna reconocimento na e studiantenan cu ta contribui na comunidad. E Minister ta spera tambe cu e premionan ta un stimulo pa sigui pero tambe pa motiva otronan pa nan tambe carga nan responsabilidad.

Rector Thode a bisa cu e ta spera cu tur e studiantenan lo sigui riba e caminda di desaroyo, durante nan estudio y despues,pa sigui mehora conocemento y brinda servicio na comunidad. “Ora cu gara e oportunidad pa educacion superior, no ta solamente traha fundeshi propio, pero ta yuda forma un nacion mas exitante, uno mas desaroya y uno mas ilumina,” tabata e palabranan di Dr. THode.

Danki special ta bai na tur e sponsornan:

SETAR,Aruba Bank,Freezone Aruba,Center Point Developers,Back Street,Mandara SPA,Taste of Belguim,Gianni's Group Nv,de Palm Cooperation,CATC,Masifral,VanEps Kunneman VanDoorne,Jossy Catering & Services,Kuster Law,Fundahson Donny Lacle.

Muy especial Sra. Shauna Porter y e studiantenan:Tracey Werleman, Maurtisz Ras ,Anika Stevens (cu a zorg pa e bunita design, Concuela y su grupo pa e bunita poezia y Ursula Lopes pa su canto.