| Gobierno: Cooperacion excelente di gobierno cu institutonan renombra na mundo a haya atencion di Gobernador den su discurso |
 |
 |
| Tuesday, 11 September 2012 20:23 |
|
E maneho di Gobierno riba comunitarismo, su cooperacion cu partnernan importante y di energia duradero como un sector economico nobo a haya hopi atencion di Gobernador di Aruba den su discurso. Un discurso na ocasion di apertura di Aña Parlamentario nobo. Den sala di Parlamento den presencia di miembronan di Parlamento, Ministernan di Aruba, demas invitadonan y un publico di hobennan entusiasma y otro interesadonan, Gobernador di Aruba sr. Freddy Refunjol a duna su discurso den cua el a repasa e puntonan mas importante di gobernacion di e aña cu a pasa y a enfoca riba loke ta e plannan pa e aña cu ta bin. “E desaroyo alentador cu nos ta wak den e cifranan financiero economico, ta refleha solamente un parti di loke ta sosode den nos pais. E esfuersonan haci den bario y casnan di famia pa yuda otro den tempo dificil, e cantidad di organisacionnan boluntario cu a y ta yuda alivia necesidad y mehora e calidad di bida di famianan, e empresanan cu a scoge pa limita nan ganashi enbes di kita hende di trabou, ta ehempelnan di e esfuersonan cu hopi hende a y ta haci pa hiba nos pais padilanti”. Gobernador a bisa cu e esfuersonan aki a crea un sentido di responsabilidad comun y un solidaridad nobo haciendo e pais aki uno mas fuerte ainda. Gobernador Refunjol den su discurso a accentua tambe e bon cooperacionnan cu Aruba tin cu mundo eyfo. E cooperacion cu institutonan prestigioso manera TNO y Harvard riba tereno di estudionan cientifico pa loke ta energia renobabel ta nifica e cooperacion na e nivel mas avansa na mundo. Mescos tambe e cooperacion cu Universidad di Pennsylvania y cu The New America Foundation riba planificacion y desaroyo urbano, envolvimento social y reenforsando comunitarismo ta duna un profundidad na iniciativanan den renobacion fisico y social di e comunidad aki. Un otro cooperacion cu ta pone Aruba riba mapa di mundo ta esun cu Carbon War Room cu ta yuda haci e transicion di uso di combustibel convencional pa energia ‘berde’ mas efectivo y e transformacion cu nos pais ta pasando den dje, uno duradero pa nos hendenan mes. E cooperacion cu Reino y su institutonan pa realisa tur esaki ta crucial. Gobernador a remarca cu Gobierno di Aruba ta sumamente agradeci pa e sosten y cooperacion den esaki. Aruba tin condicionnan climatologico ideal pa ta un laboratorio modelo riba tereno di energia renobabel. Awor mas cu nunca tin cu haci bon uzo di esakinan den desaroyo di nos pais. Den e proceso pa reemplasa uzo di energia convencional pa energia renobabel y reduci e dependencia di crudo como fuente principal di energia, a haci inversionnan grandi den aumenta e eficiencia di produccion di awa y energia. Esaki a wordo completa e aña aki. |
Mustra/Kita e formulario di comentario
