Minister Michelle Hooyboer-Winklaar: Bok’i Brik ta un exposicion interactivo impresionante

Sunday, 16 September 2012 19:19

Diadomingo mainta Minister di Asuntonan Economico, Asuntonan Social y Cultura, Michelle Hooyboer-Winklaar, a efectua apertura di e exposicion temporal nobo di Museo Arqueologico Nacional di Aruba titula “Mi ta bibo. Bok’i Brik”.

E exposicion ta conta na un forma interactivo e historia di e boto di bela conoci como “brik” cu a zink y e excavacion di preservacion cu ta tuma luga 121 aña despues na Bok’i Brik, actualmente conoci como Andicuri of Puente. Minister Hooyboer-Winklaar a expresa cu entusiasmo cu e tabatin e privilegio di mira un “preview” di e exposicion. Como cu Museo Arqueologico a diseña esaki specialmente pa apela na no solamente hende grandi, pero tambe na mucha, Sra. Hooyboer-Winklaar a hiba su yiu muhe di cinco aña, Morgan, pa tambe “test” e exposicion. E resultado tabata cu henter weekend Morgan a papia tocante su experiencia, e mandatario a comenta. Minister Hooyboer-Winklaar a felicita e team di museo, bisando cu esaki ta “un señal cu e team di museo a haci un trabao sumamente impresionante” cu ta presenta un combinacion interactivo di historia y participacion activo pa bishitantenan. E titular di cultura a bisa cu sigur e exposicion aki lo biba den nos comunidad, cumpliendo cu e vision di museo pa bira un caminda unda cu hende di tur bario, tur districto y tur edad por reuni y gosa di diferente exposicion y programa. E team ta haciendo un tremendo trabao di presenta e museo como “un cas pa nos comunidad”, Minister Hooyboer-Winklaar a enfatisa, anunciando tambe cu Museo Arqueologico di Aruba lo crea diferente oportunidad y presenta diadomingo como un dia unda cu famianan por pasa un momento ameno y disfruta di e diferente exhibicionnan presenta. Durante e apertura, Sra. Miriam de L’isle a presenta un workshop gratis, unda cu muchanan a uza driftwood como base pa un bunita obra di man, cual ta keda como un bunita recuerdo di nan bishita na e exposicion. Museo Arqueologico a cuminsa cu e proceso di rescata e historia di Bok’i Brik dia 18 di augustus, 2007, ora cu e efectonan di horcan Dean a expone algun weso na Andicuri/Puente. E wesonan aki tabata di tripulantenan di Hero, un barco di bela, o sea un “brik”, cu exactamente 121 aña a zink na nos costa. Residentenan di e area aki a dera e tripulantenan cu a hoga. Milagrosamente un tripulante, Thomas Friederichs Cassens a sobrevivi. E barco tabata transportando palo geel di Maracaibo pa Europa ora cu e efectonan di un horcan a causa e brik dal riba e costa di calichi y a sink. Cu tempo e historia aki casi a bay perdi y masha poco hende ainda tabata corda mes cu e bahia aki tabata wordo yama Bok’i Brik. Museo Arqueologico di Aruba a conduci un investigacion extenso, a haci uzo di informacion di archief y historia oral pa asina arma e storia bek. E exposicion ta presenta temanan manera nabegacion, condicion di tempo, investigacion arkeologico y e necesidad pa conserva nos herencia. Museo Arqueologico ta habri di diamars pa diabierna di 10or di mainta pa 5’or di atardi y den weekend di 10or di mainta pa 2or di atardi.