Gobierno: Hato, honra cu bishita di Prome Minister Eman

Sunday, 16 September 2012 20:17

Diabierna cu a pasa Prome Minister Eman a bishita e bario di Hato. Esaki den cuadro di e proyecto BoBario na unda Prome Minister hunto cu team BoBario di Ministerio di Asuntonan General y empleadonan di departamentonan di gobierno manera Serlimar, DOW, Gele-Koorts Muskieten Bestrijding y otronan ta cana den e bario pa mira y tende loke mester wordo drecha, haci limpi y otro preocupacionnan.

Ya den siman e limpiesa haci dor di Serlimar a cuminsa den e bario di Hato. Prome Minister a wordo compaña pa e habitantenan di e bario cu ta Dennerich Kelly jr., Anthony Henriquez y Boy Roch. No solamente casnan den Hato a wordo bishita, pero tambe algun cas den Ponton y Tanki Flip. Loke ta remarcabel ta cu e bario di Hato ta existi mas o menos 12 aña caba y ningun caya tin caminda di asfalt. E stof tabata un di e kehonan tambe cu a wordo treci dilanti. Prome luga cu Eman a bishita ta ‘Angel’s speelschool’. Di tempran e chikitonan tabata wardando ansioso riba su yegada. Nan a haci un presentacion chikito p’e. Hopi leuk mes. E muchanan a wordo prepara pa e bishita di Eman y nan tabata consciente ken e tabata. Juffrouw Nina a duna Prome Minister un recorido den e scol na unda tin 70 mucha di 4 luna te 4 aña ta keda durante dia. Juffrouw Nina a splica cu loke e semper kier pa e scol ta un plantacion. Tur aña e ta haci un proyecto cu su muchanan riba plantacion. Nan ta planta un simia den un potchi y wak e crece y bira un mata. Juffrouw Nina lo desea di haya un pida tereno banda di e scol pa nan expande e proyecto aki unda e matanan por bay den tera y crece bira mas grandi. “Mi a puntra Prome Minister Eman si e muchanan por haya un ‘klein tuintje’ na unda e plantacion aki por bin. E tereno mester ta cerca di scol”. Juffrouw Nina a bisa cu Prome Minister a bis'e cu plantacion ta un tema cu gobierno tin riba su agenda pa barionan. “Mi a keda masha contento cu e contesta aki”. Sra. Edith Henriquez-Tromp, un habitante di Ponton, pa casi 20 aña a bisa di ta hopi contento cu e bishita di Prome Minister. “Esaki ta un bishita cu nos tabata sperando riba dje. Ocho aña largo nos tabata un bario lubida y bandona”. Sra. Henriquez a bisa di ta agradecido cu tur e trabounan cu e actual gobierno ta bin ta haciendo. “Tur caminda tin cambio positivo tumando luga. Aruba ta cambiando y birando un luga bunita”. “Nos a haya un bishita di sorpresa awe”, asina sra. Maria Josefina Kock di caya Brusca a bisa. “Ta pa prome bes cu un Prome Minister ta pasa den nos bario pa scucha nos”. Loke cu ta e problema pa e habitantenan ta e rotzooi cu tin riba caya tras di EPB school. “Tin hende ta bin eynan pa tira nan sushi y otro rommel. Esaki ta un mahos bista. Dor di Aloe Balm hopi turista ta pasa aki banda y nan ta mira un bista asina mahos cu ta un berguensa grandi pa henter Aruba. Ta p'esey cu mi ta asina hopi contento cu e gobierno aki a bin haci un bon clean up”. Un otro peticion di sra. Kock ta pa bin cu iluminacion eynan. Prome Minister a priminti cu lo bin asfalt y tambe luz. E dia tabata un bes mas exitoso. Na final Prome Minister Eman hunto cu algun habitante di e bario Hato a come un dushi plato di bacalou cu banana hasa na cas di famia Roch.