Aruba Reef Care ta organisa otro grandioso accion di limpiesa

Friday, 21 September 2012 12:41

Aruba Reef Care Project, conoci como e proyecto anual pa conscientisa publico ariba e importancia pa cuida y proteha nos lama y beachnan. Esaki lo bira di 19 aña consecutivo cu boluntarionan lo dedica na tempo pa juda mantene nos beach y lama limpi y bonita.

Tur aña manera ya ta custumber, pero en particular durante evento nan manera World Water Day, Dia Di Tera den luna di April, comision di Aruba Reef Care ta duna serie di presentacion na scolnan basico, secundario, hotelnan, service clubs y Universidad di Aruba.

Manera ta conoci e proyecto aki a inicia na Juni 1994. Tabata un iniciativa di Sr. Castro Perez y conjuntamente cu Sr. Byron Boekhoudt, Biologo Marino cu ta e co-fundador di e bonita proyecto ambiental pa nos comunidad. E iniciativa a wordo ricibi cu tur apoyo necesario for di oficina di turismo (Aruba Tourism Authority) y tambe otro instancia nan manera AHATA, compania nan di deporte aquatico, hotelnan y otro organisacionnan.

Progreso di Aruba Reef Care Project

Por a mira un adelanto grandi y principalmente cu menos sushi bow di lama, principalmente ariba e rifnan di coral y tambe na e sitionan di sambuya. Ainda tin hopi esfuerso cu mester ser hasi pa mantene nos beach y lama limpi. Según cu e añanan ta pasa, e cantidad di participante tambe a subi masha hopi mes y den algún ocasión nos a jega di haya mas di 1000 participante. Despues di tanto aña nos bisa cu satisfacción cu hopi menos ton di sushi ta wordo colecta. Ta un satisfacción grandi pa nota cu varios otro organisacion ambiental a nace despues di Aruba Reef Care Project. Un di grupo ta e comison ambiental di AHATA cu ta bai cumpli 11 aña consecutivo cu nan ta organisa e "Coastal Clean-up" na luna di November.

Aruba Reef Care Foundation ta gradici e patrocinador principal cu ta Aruba Tourism Authority, RBC Royal Bank, Santa Rosa, Hadicurari Centro di Pesca, Mourik Caribbean N.V., Total Services, Clean Masters, Stichting Neptalie Henriquez Park y Oduber Agencies y varios hotel cu a hasi donación di caha di sandwich, boter di awa y softdrink pa e boluntarionan.

E Centro di Operación ta na Neptali Henriquez Park

Neptali Henriquez Park ta wordo usa como e centro di operación. E interes ta hopi grandi atrobe pa aporta na e campaña di e aña aki. E sitionan cu lo bai cubri ta entre otro tras di Faro California, Arashi, Boca Catalina, Malmok, Hadicurari, e beachnan dilanti di e hotelnan na Palm Beach, Eagle Beach, Ruina di ex Bushiri Resort, Parke Wilhelmina bai direction Neptalie Henriquez Park, Beach na Surf Side y Nikki Beach, Spaans Lagoen, Mangel Halto, Santo Largo, Baby Beach, Santana di Cacho, Grape Field, Boca Grandi y e area rond di Neptali Henriquez Park. Ta hasi un petición na henter comunidad pa conhuntamente manifesta nan compromiso cu medio ambiente y juda mantene nos beach y lama limpi. E operadornan di deporte aquatico a compromete nan mes pa juda cu e operacion den awa. Aruba Reef Care Project ta pidi tur grupo ambiental, clubnan social, scoutnan, skolnan y tambe boluntarionan pa contribui na e campaña. Esnan cu kier participa por tuma contacto cu nan operador di deporte aquatico faborito of tuma contacto via telefoon cu Santa Rosa Tel. 585- 8102 (puntra pa Glenda Bareño) y na Hadicurari Centro di Pesca Tel. 586-0820 (Puntra pa Castro Perez) Via e-mail na : arubareefcare@gmail.com y tambe bira nos amigo ariba e pagina di Facebook cu ta: Aruba Reef Care. Tur participante, ademas di e satisfaccion di haci Aruba limpi, ta ricibi un t-shirt, sandwich box, awa of soft drinks y después di acción di limpiesa na Neptali Henriquez Park lo ricibi un certificado di aprecio y por participa na rifa pa diferente premionan atractivo. Nos ta conta ariba e apoyo di henter e comunidad di Aruba pa yuda proteha nos recursonan natural.