| Edificio bieu di Belasting lo pasa di ruina di pasado pa joya di maneho publico |
 |
 |
| Friday, 21 September 2012 21:07 | |||
|
Fundacion Desaroyo Aruba tin na disposicion un suma di aproximadamente 11 miyon Florin. E inversion aki lo rescata un propiedad icono di nos isla, riba un ubicacion premium cu ademas ta spaar e hopi pais mas cu esey den pago di huur di edificionan priva. Relaciona cu e proyecto, a papia cu Sr. Emile Herde, kende ta forma parti di e Infra-Commissie di Ministerio di Infrastructura den Gabinete Mike Eman. Sr. Herde a splica cu dialuna awo mas tarda lo sali den corant e anuncio caminda e companianan interesa por bay cumpra e bestek pa haci nan oferta di ehecucion di e reconstruccion di e edificio. Despues di esey ta sigui otro fasenan, cumpliendo cu nos leynan administrativo. “Normal e procedura ta mas of menos 30 dia; aunke cada bestek ta otro. Ta duna nan un par di siman pa duna prijs y despues di esey ta tuma dos siman pa haya e conseho di na cua compania ta delega e trabou,” Sr. Herde a indica. Den e caso aki, tur cos ta bay FDA y su directiva ta duna e aprobacion. Teniendo e proceso aki na cuenta. Sr. Herde ta calcula acerca e tempo cu lo tuma pa bestel e materialnan necesario y asina por conclui cu pa luna di januari proximo lo por cuminsa mira movecion na e sitio den Paardenbaaistraat y un bes cu esaki cuminsa, e lo sigui den un solo biaha. Inicialmente, e proyecto tabata programa pa keda cla na juni 2013, pero en todo caso, un trabou di e magnitud aki ta tuma sigur entre 14 pa 16 luna di duracion. “Esaki ta necesario pa por garantisa un construccion debido y conforme tur e reglanan necesario.” Ta asina cu e diseño tabata cla for di cuater luna pasa, pendiente djie di e re alocacion di fondonan pa FDA. Pa Gabinete Mike Eman y sigur pa Minister di Infrastrctura, Benny Sevinger, e edificio aki tabata un prioridad. “For di dia nos a cuminsa como Infra Commissie, esey tabata un di e prome puntonan di MInister Sevinger. Nos a tuma precaucion riba e prespuesto di Minister mes. Asina a cera e pida abou pa evita cu hendenan por drenta, biba eynan y te hasta haci daño na e edificio,” Sr. Herde a comenta. E prome accion tuma tabata pa kita e panelnan rond. Esaki ademas di tabata un mahos bista, tambe tabata representa un peliger pa peaton y automobilistanan transitando den e area. Tambe a haci un evaluacion di e structura loke a indica cu esaki ta bon condicion y no mester a basha full e edificio abou. Inmediatamente e arkitectonan di Ontwerpenplanning di DOW a cuminsa traha riba su diseño. Tur esaki ta indica cu Gabinete Mike Eman ta riba bon caminda pa ehecuta otro proyecto cu lo ta na beneficio di pais den varios aspecto. No solamente lo rescata un inversion haci añanan di bay completamente perdi, pero tambe lo reubica dos departamento di gobierno maximalisando eficiencia y minimalisando gastonan pa e pais. Tambe ta tene cuenta cu e aspecto social caminda lo ofrece na publico un miho servicio. Un bes cu e keda cla, e edificio lo bira sede di DIMAS y Directie Arbeid.
Comentarionan (4)Mustra/Kita comentarionan ...
How the hell is this design modern?, paso e ta parce mesun mahos cu e hospital actualmente
,
September 21, 2012
Duna Comentario y/of Comparti riba Social Medi |
Mustra/Kita e formulario di comentario
