Thursday, 17 April 2014
Prome Minister Eman a convence Minister Hennis-Plasschaert di e importancia di kazerne den Reino Print E-mail
Monday, 10 December 2012 20:42

Marinierskazerne Savaneta ta keda intacto 01

Marinierskazerne Savaneta no ta core peliger di wordo cera. E afirmacion ey Prome Minister Eman a haya dialuna mainta ora el a bay bishita Minister Jeanine Hennis-Plasschaert (Defensa) pa cera conoci cu ne. Prome Minister Eman a start su bishita di trabou na Hulanda cu un bishita cerca e minister nobo di Defensa.

Durante e combersacion na unda Minister de Meza tambe tabata presente, Eman a enfatisa cu presencia di Marina riba nos isla no ta solamente importante pa Aruba, pero pa henter Reino y pa stabilidad den e region. "Marinierskazerne ta hopi importante pa nos. E interes ta bay mas leu cu solamente defensa. Kazerne ta hunga un rol importante den e trayecto di Formacion Social, pero ta asisti tambe den caso di calamidad. Ademas nos ta haci ehercicionan militar hunto. E ministernan anterior di Defensa Hillen y Van Middelkoop a haci hopi esfuerso pa tene Marinierskazerne habri. Nos ta hopi contento cu Minister Hennis-Plasschaert cu e mesun firmesa a afirma cu kazerne ta keda intacto. Nos ta agradecido na ne pa esaki, sigur pasobra cu nos ta consciente cu Hulanda mester austerisa vigorosamente, tambe riba defensa”, Eman a bisa. Eman a haci uzo di e oportunidad aki pa durante e combersacion cu a dura un mey ora, pa informa Minister Hennis-Plasschaert di e ultimo desaroyonan di e trayecto Formacion Social, un proyecto masha exitoso cu hunto cu Marinierskazerne Savaneta ta wordo ehecuta. Fin di november e prome grupo di 9 hoben a termina e trayecto exitosamente. “E minister tabata contento di tende cu e prome grupo a slaag y cu algun di nan tin trabou caba. Un certificado di e trayecto Formacion Social ta fortifica e oportunidadnan di e hobennan aki riba mercado laboral”, Eman a splica. Hennis-Plasschaert a indica cu e tin masha gana di bishita e hobennan di e trayecto Formacion Social durante su bishita na Aruba na cuminsamento di otro aña. Segun Eman e minister di Defensa Hulandes a mustra gran interes den Aruba y cooperacion dentro di Reino. “Esaki ta duna nos e confiansa cu nos por traha bon cu e minister aki”. Durante su programa pisa di e siman aki Prome Minister Eman ta tene combersacionnan cu algun otro miembro mas di e Gabinete Hulandes. Diamars e tin encuentro planea cu e Prome Minister Hulandes Mark Rutte, Ministernan Frans Timmermans (Asuntonan Exterior), Jeroen Dijsselbloem (Finanza) y cu secretario di estado Fred Teeven (Siguridad y Husticia). Diaranson Eman tin un reunion cu Minister Ronald Plasterk (Asuntonan Interno y Relacionnan di Reino) y diahuebs e ta papia cu Minister Ivo Opstelten (Siguridad y Husticia). Otro citanan importante cu e delegacion tin e siman aki ta entre otro, e lectura di Eman na Erasmus Universiteit riba diaranson, e presentacion di ‘Vaste Tweede Kamercommissie’ di Relacionnan di Reino riba diahuebs y diasabra atende un concierto di Reino na Rotterdam.

Comentarionan (3)Add Comment
Zoya den mi stoel
December 13, 2012
137.224.226.123
Votes: +3
...

Esaki a wordo bisa na september 2012 "Cierre di kazerne di Savaneta no ta na discusion" http://www.24ora.com/local-mai...discusion-

Dus ta di berdad ta show y mas show

Sabio
December 11, 2012
84.80.2.154
Votes: +8
...

E no a convence, ela djis pasa saca potret pa haci comosifuera su viahe den Business Class di KLM a sirbi pa algo. Esnan cu ainda ta kere e hendenan aki mester ta basta kens mes.

... Low-rated comment [Show]
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter