Monday, 15 September 2014
Greg Peterson: "Hende ta proteha locual nan ta stima" Print E-mail
Tuesday, 11 December 2012 16:22
DSC_2063
Cada un di nos tin un compromiso cu Aruba, principalmente cu nos turismo, pero sigur den e diferente areanan unda nos cada uno ta activo. Manera ya ta conoci, Aruba Tourism Authority (ATA) ta expandiendo e campaña di concientisacion y motivacion.

E etapa nobo di e campaña di conscientisacion a wordo lansa na cuminsamento di september cu un bista den e bida di algun individuo trahando riba diferente tereno den nos comunidad. Greg Peterson ta destaca den su compromiso cu Aruba y ta comparti su experiencia.

Sr. Peterson ta hopi conoci na Aruba trahando riba diferente tereno, principalmente pa su gran labor humanitario conhuntamente cu Cruz Cora. E ta conta di su hobby como fotografo y el a bisa cu for di tempo cu e tawatin 8 aña el a haya un regalo di su primo cu tabata un camara Kodak. "Asina e amor pa fotografia a inicia", el a expresa.

Como anecdota, el a indica cu na edad di 12 aña el a bay un fiesta di bruid cu su camara. Tabata tin dos fotografo y pa un of otro motibo tur nan potret a bay perdi. E unico potretnan cu a resta tabata esun di dje cu el a saca cu su camara amateur. Esey a sosode 42 aña pasa.

Su amor pa fotografia ta grandi, sinembargo, ta na aña 2000 -door di trabao- el a bay cana den naturaleza y di e forma aki e amor pa naturaleza di Aruba a cuminsa crece.

Actualmente Greg Peterson tin un file cual ta contene mas cu 2 miyon potret. "E parti mas fascinante ta e potretnan di nos parhanan” e ta manifesta.

Sr. Peterson tabata un siguido di e famoso Jacques Yves Cousteau y inconciente e ta uza e mesun filosofia cu Sr. Cousteau ta uza: “Hende ta proteha locual nan ta stima”. Greg Peterson a scoge pa trece un mensahe atraves di e beyeza di naturaleza y a crea e coleccion 'Imagine Aruba'. Su deseo ta pa lanta un fundacion ya cu e camaranan y material ta hopi costoso. Ademas di yuda Cruz Cora, Greg Peterson actualmente ta forma parti di directiva di Parke Arikok y e ta purba haci un link entre e parke y su gran pasion pa fotografia di nos naturaleza.

Na 2011, a keda formaliza e Stichting Aruba Birdlife Conservation y e meta di Sr. Peterson ta pa haci esaki mas amplio.

Con un dia den naturaleza ta pa Greg Peterson? El a bisa cu esaki ta depende di unda bo ta y cual parha bo kier saca potret di dje. "Cierto caminda por sconde sin interumpi (...) lagando nan haci nan cos".

“Tin otro situacionnan caminda mester di un poco camuflahe y un lens cu mas alcance pa asina por saca potret di parhanan cu ta mas sensitivo na e presencia di hende den nan habitat”, e ta bisa.

"Mas largo m’a sinta pa saca un set di potret ta casi 6 ora. Esey tabata banda di Vader Piet", e ta indica.

Greg Peterson a laga sa cu e ta totalmente autodidacta. "Mi nunca a haya les, ni di fotografia ni di nos naturaleza. Esaki ta un pasion”.

El a laga sa cu actualmente e ta trahando riba un website, di cual su meta ta pa mustra pueblo di Aruba 100 diferente specie y di cada specie cu un serie di potret.

E feedback cu Sr. Peterson ta haya for di e hende local como tambe di e turistanan ta fascinante ya cu for di esey e ta siña hopi. Hendenan di edad ta sorprend'e hopi, nan a bira mas conciente di nan medio ambiente di loke ta rond di nan, Greg Peterson a declara.

Un di e proyectonan di e amante di naturaleza aki, ta e conteo di parha. Esaki ta un iniciativa tremendo caminda por haya sa ki sorto di parha tin na Aruba y cuanto nan ta. Pa esaki Greg Peterson no a puntra e cientificonan pa haci’e, pero henter pueblo di Aruba pa yud’e.

A haya rond di mil cas cu a participa. E datonan a keda cla y nan ta na Oficina di Estadistica. "Pa prome biaha den historia nos tin un bista di nos parhanan, ki cantidad nan ta y con nan ta distribui rond di e isla", Sr. Peterson ta señala.

Kico ta haci e trabaonan diversifica asina special, cu Sr. Greg Peterson ta realiza den nos comunidad? E ta precisamente e compromiso cu e tin pa cu nos Aruba. "Mi compromiso cu Aruba ta e amor berdadero. Esaki ta mi compromiso".

"E compromiso ta cu bo mes. Concientiza nos hendenan riba e balor di nos naturaleza y nos parhanan ya cu esaki tin influencia riba nos turismo", Greg Peterson a manifesta.

 

Tocante Aruba Tourism Authority:

Aruba Tourism Authority tin como meta pa ta un organisacion di mercadeo innovativo y efectivo cu ta posiciona e marca Aruba como e destinacion turistico di prome nivel, enfocando riba calidad di e experiencia y di turismo pa Aruba. Una bes aki na Aruba, un turista su experiencia ta depende di infrastructura turistico y e interaccion cu nos hendenan. Sea cu e persona en cuestion ta traha den e industria turistico of den cualkier otro ramo, nos tur por tin un impacto positivo riba Aruba su Turismo y bienestar di nos economia y di nos isla. Pa mas informacion subi e website: www.aruba.com of “like” nos riba facebook/oficinaditurismo". Explora Aruba su app.aruba.com

 

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter