Thursday, 24 April 2014
Banco Central: Reserva divisa a subi Print E-mail
Wednesday, 12 December 2012 15:43
CBA02

Banco Central di Aruba (BCA) ta conclui den su Relato Mensual di September 2012 cu e cantidad di placa den circulacion a crece cu Afl. 127,4 miyon te na Afl. 3.264,3 miyon, causa pa un subida di Afl. 401,2 miyon den e reserva di divisa netto (excluyendo diferencianan den revaluacion di oro y reservanan internacional) te na Afl. 1.443,1 miyon.

E subida aki a wordo mitiga principalmente pa un bahada di Afl. 273,9 miyon den activo domestico netto. E crecemento den e reserva di divisa a wordo causa pa un fluho netto di divisa for di exterior relata principalmente na e emision di bono di Afl. 452,9 miyon (US$ 253 miyon) di parti di Gobierno riba mercado internacional. Un fluho netto di divisa pa exterior atribui na pagonan pa e importacion di mercancia y servicionan, y ganashi di inversion (interes y dividendo) efectua via e systema bancario, parcialmente a mitiga e subida aki. E caida den e componente domestico di e cantidad di placa den circulacion ta resulta for di bahadanan den credito domestico y transaccionnan no relata na credito di, respectivamente, Afl. 248,8 miyon y Afl. 25,0 miyon. Credito domestico a baha door cu e debe netto di e sector publico na e sector bancario di Afl. 176,5 miyon a cambia pa un debe netto di e sector bancario na e sector publico di Afl. 74,2 miyon, relata na un subida den e depositonan di gobierno di Afl. 259,4 miyon, reflehando e emision di bono di parti di gobierno mentiona anteriormente. Di otro banda, credito bancario na e sector priva a subi un poco cu Afl. 1,8 miyon (+0,1 porciento), despues di aumentonan den credito na consumidor y hipoteca pa vivienda di, respectivamente, Afl. 8,1 miyon y Afl. 2,5 miyon, mientras cu credito na empresa a baha cu Afl. 8,6 miyon. E indice di prijs di consumo (CPI) di September 2012 a registra un bahada di 2,1 porciento compara cu e mesun luna di 2011. E contribuyentenan principal na e crecemento aki tabata vivienda, vestuario, y articulonan pa vivienda. Inflacion excluyendo e componentenan di cuminda y energia (cual parcialmente ta afecta e componentenan di vivienda y transporte) a cai cu 0,6 porciento compara cu September 2011, causa pa bahada den e categorianan di vestuario, articulonan pa vivienda, y recreacion & cultura. E promedio anual di e tasa di inflacion a mengua te na 2,9 porciento den September 2012, for di 3,6 porciento na Augustus 2012. Na September 2012, e cantidad di turista a alcansa 69.718, esta 9,4 porciento mas halto cu September 2011. E aumento aki ta refleha subidanan di 10,2 porciento (+3.351 bishitante), 6,7 porciento (1.443 bishitante), y 17,6 porciento (+1.157 bishitante) den e cantidad di turista for di, respectivamente, Norte America, Latino America, y Europa. E crecemento den e mercado di Norte America ta asocia cu e subidanan den bishitantenan di Merca y Canada di, respectivamente, 7,8 porciento (+2.458 bishitante) y 61,3 porciento (+893 bishitante). E mercado di Latino America a sigui crece, atribui na un subida den bishitante di Venezuela di 7,1 porciento (+1.086 bishitante). E aumento den e mercado Europeo ta relacionan principalmente cu un aumento den bishitante di Hulanda y Inglatera di, respectivamente, 467 y 318. E cantidad di turista crucero a subi cu 1.829 of 39,3 porciento te na 6.481 na September 2012, compara cu September 2011. E cantidad di barconan a baha un poco for di 4 pa 3 na September 2012 compara cu September 2011. Na September 2012, entrada di impuesto a suma Afl. 77,4 miyon, cual ta significa un subida di Afl. 12,8 miyon of 19,8 porciento, compara cu e mesun luna di e aña anterior. E crecemento aki ta refleha gran parti e subidanan den entrada di impuesto riba ganashi, salario y grondbelasting di, respectivamente, Afl. 4,4 miyon, Afl. 3,1 miyon y 3,1 miyon. Impuesto riba divisa y di benta di negoshi (BBO) tambe a nota aumentonan di, respectivamente, Afl. 1,9 miyon y Afl. Afl. 0,6 miyon. Sinembargo, entrada no relata na impuesto a registra un caida di Afl. 3,8 miyon na September 2012 compara cu e mesun luna di e aña anterior, causa pa un bahada di Afl. 1,1 miyon den entrada di erfpacht.

Comentarionan (2)Add Comment
vimaro
December 13, 2012
201.229.74.222
Votes: +1
...

... Siña lesa y interpreta e relato di Banco Central di Aruba e ora bo conclushon lo ta completamente otro. Ta fia gobierno a fia atrobe un suma di casi AWG. 453 miyon cu mester wordo paga bek cu interes. Esaki entre otro... no a tene cuenta cu ne den su comentario.

mesa di evelyn
December 12, 2012
201.229.47.118
Votes: +5
...

evelientje evelietje, jega jega cu bo mesa na banco central. kiko ta bisa awor. kiko lo jora awor. cos ta bon, apesar cu valero a sera, pero tin un gobierno dinamico, di hende drechi cu ta traha cu alma i corazon pa un pueblo di aruba, no uno, cu a traha pa famia i amigo, jega cu e mesa, marlon ta warda bo

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter