Saturday, 29 November 2014
Minister Michelle Winklaar: Aruba a conoce crecemento den e segmento di Small Business Print E-mail
Thursday, 13 December 2012 22:29
Comparti

michelle

Negoshinan micro, chikito y mediano ta hopi importante pa economia di Aruba y ta contribui cu un 60% pa 70% di e economia di nos isla y 94% di e total di nos negoshinan ta pertenece den e categoria aki.

Calculacionnan di 2011 ta mustra cu negoshinan chikito a contribui cu un balor di mas of menos 3 biyon florin na economia di nos isla. Minister di Asuntonan Economico, Michelle Hooyboer-Winklaar ta reconoce e importancia pa Aruba tin negoshinan cu ta brinda producto y servicionan di calidad, cual tambe ta mantene un bon administracion. Como cu companianan di tamaño mas chikito ta mas vulnerabel, hopi biaha nan ta confronta retonan cu financiamento y otro factornan manera mantene nan administracion na ordo. Ta den e cuadro aki mes Minister Hooyboer-Winklaar a establece IDEA, un instancia cu ta resorta bao di Departamento di Asuntonan Economico, cu ta duna guia extenso y apoyo gratis na negoshinan micro, chikito y mediano. Desde cu el a habri na februari 2012, IDEA a registra 122 cliente, cual ta indica y confirma e necesidad di negoshinan chikito pa informacion y guia. "Remarcabel ta cu 85% di e 122 clientenan aki, ta doñonan di negoshi nobo," Minister Michelle Hooyboer-Winklaar a subraya. E mandatario tambe a establece Small Business Week, un evento anual gratis, unda cu entrepreneurnan y futuro comerciantenan ta wordo ofreci tayernan y presentacionnan pa expertonan local y internacional den diferente area di entrepreneurship. Un cantidad di mas cu 500 persona a atende e evento aki tanto na 2011 como na 2012. Ademas, e curso "Empresario Prepara", organisa pa IDEA y Enseñansa pa Empleo y a inclui tur informacion necesario, tabata "sold out". E curso aki ta tuma luga dos biaha pa aña. Adicional na ofrece sosten y guia extra, Minister Hooyboer-Winklaar a haci diferente cambio den e maneho di Ministerio di Economia pa incentiva esunnan cu ta desea y tin ambicion pa cuminsa nan mes negoshi. A reduci e tarifanan pa diferente documento y peticion necesario, a elimina documentonan cual ta innecesario y a reduci e red tape door di haci e proceso di licencia di permiso hopi mas lihe. Asina a crea un clima atractivo pa esnan cu kier cuminsa un negoshi of ya tin negoshi na Aruba. E resultado di tur e accionnan y cambionan di e maneho introduci pa Minister Hooyboer-Winklaar tabata inmediato. Di un aña pa otro caba por a nota e efectonan positivo. Den e prome mita di aña 2011, Departamento di Asuntonan Economico a otorga 825 licencia pa negoshi. Den e prome mita di 2012 e cifra aki a subi te na 1191, pues e instancia a entrega un total di 366 permiso mas den e mesun periodo di e aña anterior. Y esaki ta solamente un di e efectonan positivo di e cambio di maneho, pasobra ademas gobierno a ricibi mas peticion pa NV na 2012 compara cu 2011. Por a nota cu mas persona ta opta pa establece un N.V. enbes di un "eenmanszaak", cual ta wordo atribui como resultado di e conseho comparti durante Small Business Week 2011, Minister Hooyboer-Winklaar a splica. Durante e prome mita di 2011 tabatin 189 peticion pa establece un NV. E cifra aki, pa e mesun periodo na 2012 a subi na 296. Estadisticanan di Banco Central di Aruba, cual ta resulta di nan Business Perception Survey (BPS) ta indica cu no solamente tin mas negoshi, pero tambe cu negoshinan ta mas optimista. E optimismo, resultadonan positivo, crecemento y desaroyo den e mercado di negoshi na Aruba ta indicacionnan cu e cambionan y desaroyonan den maneho di Ministerio di Asuntonan Economico, introduci pa Minister Hooyboer-Winklaar di berdad tabata necesario y a wordo bon ricibi. Negoshinan micro, chikito y mediano ta e weso di lomba di economia di Aruba. Minister Hooyboer-Winklaar y Departamento di Asuntonan Economico ta sigui padilanti cu hopi confiansa cu e mandatario su maneho, cual ta dunando resultado positivo tanto pa e segmento aki, como pa negoshinan grandi.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter