Sunday, 20 April 2014
Presidente di COA, Sr. Roy Mezas a participa na e di ocho conferencia mundial di Deporte, Educacion y Cultura Print E-mail
Friday, 14 December 2012 17:25
DSC_2063
Recientemente Comite Olimpico Internacional, den cooperacion cu e United Nations Educational, Scientific and Cultural Organisation (UNESCO), a organisa e di ocho conferencia mundial riba deporte, educacion y cultura cu a ser teni na Amsterdam, Hulanda.

Mas cu 500 miembro di Comite Olimpico Nacional, Federacionnan Internacional, Comite Organisador pa Weganan Olimpico, institucionnan educacional y cultural, Nacionnan Uni, organisacionnan gubernamental y no-gubernamental a participa na e conferencia aki. Mester bisa cu Aruba a ser representa pa Su Excelencia Minister di Salubridad y Deporte, Dr. Richard Visser y Presidente di Comite Olimpico Arubano, Sr. Roy Mezas.

Bou di e tema "Olympism Powered by Youth", diferente sesion a ser teni, como tambe presentacionnan a ser haci den grupo, algun di nan dialogonan specialisa. Puntonan sumanente importante a bini padilanti. Pa menciona algun: e importancia di e rol di “entourage” (esta e equipo di specialistanan cu ta acompaña un atleta den full su proceso di preparación), IOC y e Movimento Olimpico, como tambe e Movimento Olimpico hunto cu e sistema di Nacionnan Uni y e sociedad civil.

E rol di "entourage” y educador (e famia di e atleta, su coach y entrenador, e staf tecnico, su manager of agente, manera defini dor di IOC) ta critico den e dispersacion di e balornan olimpico na e hobennan participando den tur deporte. Ta nesecario pa esnan cu ta constitui e “entourage” compronde kiko e balornan Olimpico ta representa, pa nan mes kere den dje y pa nan aplica e balornan Olimpico den nan trabou diario cu e atleta.

Ta importante pa IOC inclui y constitui e “entourage” den nan programa educativo y di cursonan tocante e balornan Olimpico. IOC mester sigura pa esnan cu ta asocia na e deporte en general compronde cu e deporte ta mucho mas cu solamente su balor social y entretenimento. E ta un herment importante pa guia hobennan y pa engrandese y fortalece e spirito di amistad.

IOC y Movimento Olimpico

E Movimento Olimpico ta ensera entidadnan di cua e responsabilidad ta bai mas aya cu deporte. Entre nan media y patrosinadornan. Mientras cu e sociedad riba su mes awor ta acepta medionan di comunicación masivo, specialmente e medionan social, como un forma pa encontra otro, di otro banda tecnologia ta sigui ta responsabel pa e manera di biba sedentario y ta un contribuyente na obesidad y su crecimiento, como tambe e crecemento di malesanan “non-comunicable” entre hobennan. E conferencia a nota cu satisfacción e rol positivo cu social media por hunga como un manera efectivo pa encurasha hobennan pa cuminsa practica deporte y pa keda activo den deporte tambe.

E conferencia tabata masha positivo tocante e cooperacion y colaboracion entre Movimento Olimpico, Nacionnan Uni y su sistema y e sociedad civil, den nan intento pa combati desaroyonan malo den sociedad y den cumplimento di e Millennium Development Goals. E union entre e stakeholdernan ta importante pa deporte por ser usa pa ta e “catalisador” pa respet mutuo, basa riba derecho humano manera e ta para den e Declaracion Universal di Nacionnan Uni riba Derecho Humano y e division nan di UNESCO y di IOC. Deporte mester ser considera como un herment importante pa inclusión social di gruponan margina den nos sociedad, gruponan cu limitacion fisico y pa logra igualdad di genero, entre otro.

 

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter