Wednesday, 22 October 2014
Minister Otmar Oduber ta cumpli cu e proteccion priminti na e trahador Print E-mail
Monday, 17 December 2012 23:08

Otmar Oduber003

Minister Otmar Oduber a priminti di trece proteccion pa mas trahador pa medio di cambionan den Ordenansa Laboral como tambe a logra trece cambio pa protehe e trahadornan temporal. Dialuna durante reunion publico den Parlamento a trata e promer dos di e cinco cambio di leynan laboral. Ta trata aki di cambio di ley di Ordenansa Laboral como tambe e cambio di ley di trahadornan temporal. Un di e puntonan cu a haya mas tanto atencion ta e parti di trahadornan temporal, un fenomeno conoci como uitzendkrachten cu algun compania ta mal usa pa motibo di no tabata regla den ley. Motibo principal pa regla esaki ta pa asina duna e trahador temporal e seguridad necesario y pa percura pa e dunador di trabou tin empleadonan mas eficiente y mas productivo. Minister Oduber a agrega cu a stipula e termino di cuanto tempo un persona por traha pa e por wordo tuma den vaste dienst. E mandatario a indica cu e cambio den e ley aki a bay mas leu den Reino, pa duna e proteccion necesario. E cambio aki ta uno cu a conta cu consenso di tanto representante di trahadornan como di dunadornan di trabou cu a forma parti di e tripartite, mientras cu Raad van Advies tambe a uni su mes na e ley aki y SER a duna su observacionan cu esaki ta uno bon, Minister Otmar Oduber a indica. Esaki ta un cambio necesario unda companianan cu kier den futuro fungi como uitzendbureau mester haya un licencia pa haci esaki y como un uitzendbureau, e compania mester cumpli cu e condicionnan di ta un bon empleador. Ley ta papia di 12 luna, unda cu despues di 12 luna e trahador mester wordo tuma den vaste dienst. Den Parlamento a duna e opinion cu mester bin cu un fase transitorio. Minister Oduber no kier laga ningun buraco den e ley aki y pa tal motibo a crea e ley aki di e forma cu lo no por haci mal uso di e ley pa proteccion di e trahador temporal. Pa conclui despues di 12 ora di reunion a logra finalice cu resultado positivo pa trahadornan na Aruba. Parlamento a aproba e ley aki cu un total di 13 voto na fabor (Fraccionnan di AVP y PDR) y 3 en contra (Fraccion di MEP). Pa loke ta trata e cambionan den ley di Ordenansa Laboral, esaki a haya un aprobacion unanime den Parlamento, contando cu 16 voto na fabor y 0 en contra. Minister Otmar Oduber di e forma aki, cu sosten di Parlamento, a cumpli cu e vision pa trece mas proteccion saliendo for di e leynan di Ordenansa Laboral unda cu 80 % di trahador lo por probecha di esaki. Trahadornan temporal tambe lo por considera e “contrato temporal” como uno cu tambe ta haya proteccion di e leynan di Ordenansa Laboral.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter