Durante fin di siman Sportvereniging La Fama a tene un competencia di futbol, ‘ABC Tournament’, den preparacion pa e torneo mas grandi ainda otro aña, durante e gran celebracion di 75 aña di nan existencia. Minister di Salubridad Publico y Deporte tambe tabata presente y a haya e tarea di entrega e trofeonan na e ganadonan. E weganan di futbol a tuma luga den Stadion Guillermo Prospero Trinidad y e fanaticonan tabata presente durante e dianan aki, pa duna sosten y apoyo na nan team preferi. “Esaki sigur ta tremendo iniciativa, unda ta promove union entre e islanan y p’esey ta importante pa duna nan e sosten pa keda wanta esaki. La Fama hunto cu AVB a prepara esaki y no ta prome aña cu nan ta hacie y apesar di un tiki contratiempo, toch nan a sa di logra pone un tremendo torneo riba pia,” e mandatario a splica. Aruba tabatin 3 team, Boneiro 1 team y Corsou tabatin 2 team, unda na final Boneiro a bataya contra Corsou y Corsou a logra sali victorioso. E partidonan a bay den un bon ambiente y e publico a gosa y por a sinti un dushi ambiente di hermandad entre e islanan. Giovanny Croes, tesorero y manager tecnico di division di honor di La Fama a duna di conoce cu e wega mas competitivo tabata entre e team di RCA di Aruba y esun di Corsou, unda RCA a gana e campeonnan di Corsou, logrando asina di kibra nan reputacion di invicto inoficial, pero debi na e sistema di puntuacion di gol, Rincon di Boneiro a logra bay pasa final. “Apesar cu e torneo tabata poco riba man, toch nos a logra hinca tur cos den otro y brinda tanto e hungadonan como e fanaticonan un bon torneo di futbol. Nos ta sigur cu den futuro e torneo aki lo bay hopi mas miho y sigur nos ta trahando riba vision di e celebracion grandi otro aña di Sportvereniging La Fama,” Giovanny a termina bisando.

Comentarionan (0)

Mustra/Kita comentarionan

Duna Comentario y/of Comparti riba Social Medi

Mustra/Kita e formulario di comentario

Nomber

Email

Comentario

smaller | bigger

Subscribe via email (registered users only)

I have read and agree to the Terms of Usage.

Duna Comentario y/of Comparti riba Social Medi