Friday, 29 August 2014
Minister Otmar Oduber: Otro aña, Santa Rosa lo introduci un linea di producto y insecticidanan completamente organico di e marca “Agrobiologicos Safer Print E-mail
Tuesday, 18 December 2012 17:43

Otmar Oduber019

 

Actualmente Santa Rosa ta conta cu un maneho nobo cu tin como meta pa introduci sistemanan cu no solamente ta yuda sostene y desaroya nos sector primario, pero cu tambe ta conta cu tur aspecto di seguridad den tur e alimentonan cu ta wordo produci localmente.

Un aspecto cu sigur a wordo teni den consideracion ta e diferente productonan toxico cu awendia ta ser usa pa combati malesanan den mata of den suelo. Despues cu e profesionalnan di Santa Rosa a tuma nota di e efectonan negativo cu cierto productonan lo por tabatin riba e flora y fauna di Aruba y primordialmente e salud di nos hendenan, a dicidi conhuntamente cu Minister Otmar Oduber pa tuma e medida di concientizacion y prevencion dor di stop e venta di tur productonan toxico y introduci productonan organico na nan clientela cu diaramente ta haci compras, specialmente nos cunukeronan. E maneho aki lo wordo introduci pa 2013 na unda cu Santa Rosa lo bay stop cu e venta di tur productonan toxico y peligroso y den hopi pais rond di mundo no ta wordo permiti pa wordo usa. Despues di a studia diferente producto disponibel, a dicidi pa e productonan di e marca “Agrobiologicos Safer” cual ta un compania estableci na Colombia. Lo cual ta mas interesante ta cu e propietario a haci su estudio completo na e Universidad di Wagening na Hulanda y a diseña tur su productonan aplicando e mihor sistemanan Europeo. Un total di 9 producto lo ta disponibel di un mihor calidad, economico y mas importante sin ningun peliger pa nos medio ambiente. Algun di e productonan cu lo wordo introduci ta : Antrasin : Antracin ta un insecticida cu ta wordo traha riba base di Sulfato di Coper y Sulfato di Calcio, cual a wordo usa den agricultura pa mas cu 100 aña cu resultadonan exitoso. Antrasin ta wordo usa pa preveni y cura Royas, Tizones, Mildeos, Sigatokas, Bacteriosis y Antracnosis. Alisin : Alisin ta un producto basa riba e extracto di conofloc, cual ta ideal contra e maneho di plaga y enfermedadnan den un variedad grandi di plantacionnan, specialmente contra Afido Negro. Rutinal : Rutinal ta basa riba extracto di e blachi di Ruda, cual ta contene mas cu 100 substancia, entre otro ; Rutin, Rutarin y Limoneno, cual ta actua como desinfectante di tera, fungicida y insecticida. E meta principal di Santa Rosa conhuntamente cu sosten di Minister Oduber ta concientiza nos productornan local en cuanto di e peligernan cu e productonan tin pa nos hendenan y nos medio ambiente y cu den un futuro sercano por stop e importacion di e tipo di productonan halto den toxico na nos isla. Di acuerdo cu Minister Oduber, “ Nos isla su medio ambiente mester wordo preserva mescos cu nos suelo y awanan y ta mi responsabilidad pa sigura cu nos sector primario por ofrece productonan saludabel cu no ta representa ningun tipo di peliger pa nos hendenan”. Pa mas informacion riba e productonan cu Santa Rosa lo introduci por tuma contacto cu Santa Rosa na 5858102.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter