Saturday, 30 August 2014
Gobierno: Prome Minister Eman a toca e tema ‘Relacion cu Europa despues di 2013’ Print E-mail
Tuesday, 18 December 2012 19:54

mike erasmus

Siman pasa Prome Minister Eman tabata invita pa duna un ‘gastcollege’ na Erasmus Universiteit na Rotterdam. El a toca varios tema. Tambe con e relacion cu Europa ta bay ta despues di 2013. Na 2012 e relacion LGO ya no ta uno hopi significante pa Union Europeo y Aruba como cu LGO tin poco beneficio.

‘Asina mes negociacion ta andando na Brussel pa renoba e acuerdo di LGO pa e periodo 2014-2020 y pa purba duna mas contenido na e relacion di LGO’, Eman a menciona. Esaki ta sosode den forma di acceso menos complica na e mercado Comun di UE y cu placa di ayudo di desaroyo cu lo ta menos burocratico pa administra. Pero mester keda realistico. Mirando e crisis financiero na Europa no ta anticipa cambionan grandi pa cu e LGO-nan.

Na mes momento Aruba por reflexiona despues di 2013 ki relacion por ta mas beneficioso cu Europa fuera di LGO. Hecho ta cu door di e opcion hancra den e tratadonan Europeo awor Aruba tin e derecho di scoge si un otro relacion basa riba mas balor y oportunidad ta deseabel.

Ta conoci cu e relacion di Region Ultraperiferico por trece hopi mas beneficio pa un isla desaroya manera Aruba. Islanan manera Madeira y Islanan Canario tin un relacion asina caba y eynan e status special di Region Ultraperifico dentro di UE a trece hopi prosperidad y bienestar pa e comunidadnan.

E meta principal pa Aruba su futuro relaciona cu Europa ta keda den oportunidadnan social y economico cu ta beneficioso pa e pueblo.

Escogencia Racional pa keda de Reino y busca mas oportunidad dentro di Europa

Eman a referi na e escogencia racional di Aruba pa keda den Reino: ‘Tur esaki ta cuminsa cu e escogencia di Aruba pa keda den Reino Hulandes. Pa cierto pais e proceso di decolonisacion a resulta den independencia. Pa Aruba e proceso aki a resulta cu nos mes a scoge conscientemente pa sigui forma parti di Reino Hulandes’. Aruba a scoge emocionalmente pa establece nos propio escudo, himno y bandera. Pero racionalmente pa bira (y keda) autonomo dentro di Reino Hulandes. Nos partnership cu Hulanda ta defini cu Reino ta responsabel pa relacionnan exterior, defensa y nacionalidad. E maneho interno di nos economia, nos enseñansa, nos cultura ta algo cu nos mes ta haci. E beneficionan di ta parti di Reino ta grandi pasobra Aruba por haci uzo di e stabilidad y red mundial cu Hulanda tin sea directo of via Union Europeo. Ehempel di esaki ta e acceso na Embahadanan rond mundo, cu tabata hopi util durante e problematica recien cu e refineria na Aruba. Embahadanan Hulandes tabata cla pa pone nan staf di expertonan na disposicion di Aruba pa establece contactonan directo cu gobiernonan di Colombia y Brazil. Hulanda ta responsabel pa proteccion militar di Aruba. Prome Minister Eman a menciona cu esey ta pone cu nos ta cay bou di e sistema di proteccion di NATO (OTAN) cu ta algo di como importancia mirando e turbulencia geopolitico den nos region. Via Reino Hulandes, Arubianonan tin acceso na Corte di casacion y por biba y traha unda cu ta den Union Europeo. Tur esakinan ta beneficionan pa e pueblo di Aruba como resultado di e escogencia, e conexion, pa forma parti di un entidad mas grandi cu ta Reino Hulandes.

Tempo di Presidente Lincoln, nan tabata confronta e mesun reto. Lincoln mester a convence e pueblo di un pais dividi cu formando parti di un Union ta mucho mas beneficioso. Lidernan di Union Europeo ta pasando den un momento clave di su historia caminda nan tin cu convence e ciudadano cua ta e beneficio y balor real pa sigui forma parti di un Union. Lidernan Europeo ta bin hunto den cumbrenan politico, pero cada bes ta faya pa yega na un acuerdo comun. Europa tin un rol importante den economia mundial. Europa, y mundo henter ta wardando riba un mensahe cla y raspa caminda e balor di e Union y su beneficionan pa e pueblo pa cu futuro ta worde treci dilanti. Cada bes ta un desapunto grandi ora e solucion di e crisis ta wordo presenta den structuranan tecnico mientras cu pueblonan ta wardando riba un mensahe grandi y visionario dicon mester sigui como un Europa Uni.

Eman a finalisa bisando cu e ta spera cu e lidernan Europeo por haya tempo mey mey di e reunionnan tecnico complica na Brussel pa bay wak e pelicula di Lincoln pa asina haya inspiracion con soluciona e crisis cu nan ta pasando aden.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter