Thursday, 17 April 2014
Comerciantenan contento y optimista cu Caya Grandi Print E-mail
Tuesday, 18 December 2012 20:07

comerciante Caya Grandi

Esey ta loke a keda compila den transcurso di diasabra combersando cu varios comerciante. E Dia di Compras cu a keda organisa entre Gobierno di Aruba y MAMBO a produci resultadonan cu a surpasa expectativa y a keda traduci den numbernan halto di benta pa e comerciantenan den caya Libertador G.F Betico Croes.

Pueblo di Aruba a duna oido na e invitacion haci y como muestra di solidaridad a bay for di oranan di mainta te anochi laat pa cumpra den e pacusnan loke nan tin mester pa e dianan di fiesta. “E ultimo dianan caba nos ta riparando cu dor cu e caya ta den su fase final, bo ta sinti e movecion hopi mas positivo. Nos ta contento cu e desaroyo cu tin,” asina Justo Lopez di The Pastechi House a bisa teniendo na cuenta cu e proyecto no a caba y ainda tin mas pa bin. “Sigur e ta bay ta un joya di caya ora tur e matanan ta na nan luga. E ta bay ta un adelanto hopi bunita pa nos comerciante den caya, pero pa e pueblo en general tambe,” Lopez a indica. E comerciante veterano a keda impresiona cu e cantidad di hende cu tabata cana riba bou diasabra ultimo, riba trottoir y riba e rails tambe di e streetcar cu pronto lo cuminsa funciona. “Si bo wak cuanto hende awe tin den caya ta e duna un impresion caba cu e ta bay contribui ‘big time’ na nos economia.” Di parti di pueblo, tambe a sinti un aire di optimismo, pero sigur di solidaridad. “Mi ta hopi contento aunke e no ta ful cla ainda. Mi ta kere hende ta contribuyendo cu tur e comerciantenan pa mantene cabes riba awa. Caya a keda tremendo. E ta duna bo speranza,” asina Lucio Rivadeneira a comparti mientras e tabata haci compras. Naturalmente cu e caminda no tabata uno facil. Gobierno di Aruba a tuma caya grandi pa rescat’e na un momento cu henter mundo tabata biba un crisis financiero. Pero manera expertonan economico ta indica, ta den temponan dificil bo mester inverti mas. Esey ta loke Gabinete Mike Eman a haci. Na luga di sinta lamenta, a dobla manga y a traha pa un miho mañan, cu diasabra ultimo a yega. Justo Lopez ta di opinion cu e proyecto di renobacion di Caya Grandi y henter Oranjestad ta uno cu no mester a busca resultadonan instantaneo. “Logicamente nos a sufri, el a tarda hopi pero bo mester wak riba termino largo. Nos tabata mira e trabou tur dia, e ta un trabou grandi; sigur pa Aruba, hopi ambicioso. Pero nos ta positivo. Loke ta patras a keda patras, awor nos ta wak dilanti,” e empresario a bisa cu hopi animo y determinacion. E plan di un streetcar pa transporta turistanan riba henter trayecto di caya grandi, tambe ta un idea cu e ta kere den dje. “Tin un adelanto tambe. E idea concreto di trece turista crucero den caya ta un ‘win win situation’ tanto pa e turista cu lo tin opcion di cana bay bek of coy e tram como pa e comerciantenan sigur, compara cu con e tabata.” No solamente e ta kere den e idea, pero tambe ta duna un satisfaccion como Arubiano. El a splica esaki bisando cu “E ta bay duna contenido na Caya Betico Croes. Ami sigur, como Arubiano orguyoso, ta contento cu e desaroyo cu tin.” Lucio Rivadeneira pa loke ta trata e streetcar ta dun’e e beneficio di duda. “Ami lo ta un di e prome hendenan cu lo provecha di subi e tram. Despues di esey lo mi duna mi opinión. Pero mirando tur e splicacionnan mi ta kere cu e lo ta beneficioso pa un y tur,” el a bisa. Di su banda, otro comerciante den caya, esta Sergio Laurent tabatin solamente un hari y cos bon pa bisa. “Nos ta bayendo super bon, nada di keha. Nos tin nos tent pafo y paden tambe ta yen yen. Tur cos ta bayendo manera planea.” El a splica tambe cu awor cu tur cos ta cla, den caya ta facil pa cana. E siman aki a inicia un serie di Shopping Night den Caya Libertador G.F. Betico Croes. E actividadnan aki ta loke gobierno hunto cu directiva di MAMBO ta busca pa incentiva mas ainda e movecionnan den caya principal, durante e dianan aki di fiesta.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter