Monday, 28 July 2014
F.A.D.A. Bon Pasco Y Prospero anja 2013 Print E-mail
Thursday, 20 December 2012 10:32
DSC_2063
Pasco ta e temporada mas bunita y significativo di henter e aña. Un temporada pa refleciona kiko ta e berdadero nificacion di pasco. E nacemento di nos dushi niño Hesus. E temporada aki no ta solamente di ricibi amor pero tambe pa duna un amor sincero, sin spera nada a cambio.

Un bunita momento pa pone tur nos fe den señor. Dor di pone fe den señor hopi persona a logra cambia nan forma di ta y nan forma di pensa pa bira un mihor persona den nos comunidad.

Señor ta sinonimo di amor y salbacion si bo kere den dje bo biba lo tin un mihor significacion y si bo confia den dje, nunca lo bo sinti bo so.

Un temporada pa laga tur materialismo un banda y comparti cu otro como famia. Mayronan un bon temporada pa para keto y evalua con nos relacion cu nos yuinan ta y con hiba un combersacion sano riba e tereno di alcohol y droga. Demostra nos yuinan tur dia e mihor di nos y sea semper un bon ehempel. Siña nos yuianan con pa tuma decionan y laga nan para responsabel pa nan actonan.

Den wowo di Dios nos tur ta igual, adicto o no adicto. Un persona adicto tin e nesesidad di hopi amor, principalmente e amor di su famia.

Ban laga e pasco aki trese mas union den seno familiar. Ban duna mas atencion, comprencion, dedicacion y aceptacion pa cu otro, pa asina nos tur duna amor pa por ricibi amor. Un persona adicto ta un persona mescos cu tur hende. Pesey cada famia aki na Aruba cu tin un familiar den adicion laga tur rencor y tristesa un banda y celebra e pasco aki hunto cu ne. Hunto pone como meta pa yuda otro pa por sali for di e problema di adicion. Pa esnan cu a tuma e desicion di hiba un bida liber di droga keda para firme den bo desicion, y yuda otro pa tambe tuma e bon desicion di hiba un bida liber di droga. Pa esnan cu ta den tentacion corda semper cu e desicion di keda liber di droga ta den bo man. Corda semper cu e mundo di droga ta trece hopi negativismo tanto emocional, fisico y social.

Nos kier gradici tur nos colaboradornan cu a yuda di un manera of otro pa e sosten ricibi den aña 2012. Alaves nos kier a desea tur nos colaboradornan hopi exito y forsa pa nos lucha contra droga/ adiccion den e aña venidero. Nos ta pidi un suplica na e pueblo di Aruba pa e consumo di alcohol ta conciente y modera y si bo bebe no stuur y si bo ta stuur no bebe pa asina evita accidente cu consecuencia nan fatal.

F.A.D.A kier a desea henter pueblo di Aruba un bon pasco y prospero aña 2013. Pa hunto nos keda un Aruba liber di droga.

 

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter