Thursday, 24 April 2014
Departamento di emergencia di hospital cla pa e dianan di fiesta Print E-mail
Thursday, 20 December 2012 16:24
DSC_2063
E dianan di fiesta di Pasco di nacemento y di aña nobo ta nos dilanti. Mirando e añanan anterior Departamento di Emergencia di Hospital tin experiencia di haya mas bishita riba e dianan aki cu normal. Ta hopi importante pa pueblo di Aruba tene na cuenta cu Departamento di Emergencia ta primordialmente pa casonan di emergencia.

Departamento di Emergencia (SEH)

Ta bon pa indica cu e cantidad di pashent cu departamento di Emergencia ta yuda durante dianan di fiesta ta halto. Door cu dokternan di cas no ta traha cu cita riba dianan di fiesta ta acudi na Departamento di Emergencia pa consulta cu un dokter. Consecuentemente Hospital ta haya nan mes cu pashentnan pa dokter di cas na e Departamento di Emergencia cu de facto no ta pertenece na e departamento aki. Esaki ta causa tempo di espera largo pa e pashentnan. Pa e dianan di fiesta nos dilanti Departamento di Emergencia lo conta cu extra personal pa purba alivia e fluho di pashentnan y asina purba tene e ora di espera uno rasonabel.

Tur pashent cu acudi na Departamento di Emergencia lo pasa via di e sistema di triage door di un profesional den enfermeria di emergencia. A base di e triage aki, cu ta un sistema internacional standarisa, lo determina e urgencia di e pashent. Y a base di e resultado aki e pashent lo wordo atendi mes ora of e tin cu warda riba otro pashentnan cu ta di mas emergencia. Asina ta tene bon na cuenta cu ora di espera no ta basa riba “first come first serve” . E por pasa cu bo ta casi na turno y ta presenta otro pashent cu ta di mas urgencia y e pashent aki lo wordo atendi consecuentemente mas prome.

Dokter na warda/ Huisartsenpost (HAP)

Si bo tin un caso cu ta rekeri atencion di un dokter di cas por acudi na oficina di dokter na warda miho conoci como Huisartsenpost (HAP) situa banda di Policlinica Urologia. Riba dianan di fiesta e orarionan ta di 9or di mainta te cu 1or di merdia y di 6or di atardi te cu 10or di anochi.

Tur pashent mester presenta cu nan carchi di AZV y si esaki no ta e caso lo ta necesario pa paga den forma cash pa e servicionan ofreci.

Ta bon pa menciona cu dia 24 y 31 di december, Bispo di Pasco y Bispo di aña nobo e oficinanan di dokternan di cas lo ta habri normalmente segun nan orario di trabou.

Dr. Horacio E. Oduber Hospital ta spera cu henter comunidad gosa di e dianan di fiesta cu ta nos dilanti, pero na un manera sano y cuidando salud. Pone bon atencion den trafico, bay poco poco cu alcohol y mas cu claro no stuur auto bao influencia di alcohol. Na tur pashent cu tin un dieta a base di un conseho di dokter ta pidi pa mantene na esaki durante e dianan venidero.

Si ta necesario pa acudi Departamento di Emergencia ta importante pa trece carchi di AZV pa asina yuda e proceso di inscripcion di e pashent cana mucho mas lihe y eficiente.

 

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter