Tuesday, 21 October 2014
Segun director Jaime Falconi: Hospital ta trahando mas eficaz y eficiente maske tin scarcedad di personal y di placa Print E-mail
Friday, 21 December 2012 18:35

Hospital

Durante e entrevista cu Dr. Jaime Falconi, Director di Hospital dr. Horacio Oduber, a puntre riba e servicio cu mester wordo duna na hospital, mirando cu tin biaha tin kehonan cu e cantidad di enfermeronan pa duna servicio na esnan interna riba piso ta poco y e atencion na e pacient no ta suficiente. Dr. Falconi a splica cu tempo cu e hospital a ser traha a pensa riba 60 mil habitante na Aruba, awor e populacion a crece na mas cu 100 mil y si conta e turistanan por papia di 120 mil caba. Falconi a bisa cu no ta solamente e cantidad di hende sino tambe e calidad di problema medico, por ehemplo e accidentenan di trafico cu a aumenta dramaticamente na Aruba y cu ta rekeri di personal mas specializa pa trata e casonan. Tambe malesanan cronico ta aumentando dramaticamente na Aruba y nos poblacion ta bira mas bieu. Antes tabata tin mas hende grandi cu tabata keda largo na hospital. Awendia esaki a cambia pasobra hospital a tuma den servicio un docter specializa den hende grandi cu ta haciendo un trabao hopi bon na Maris Stella y esaki ta asina bon cu nan ta bay expande cu otro specialista mas. Esaki ta haci cu menos di nos grandinan ta drenta hospital pa largo tempo. Na servicio di emergencia e hendenan grandi si ta tuma mas tempo y e enfermeronan ta dunando nan tur e atencion cu nan ta rekeri di dje, segun director. Si ta asina cu hospital tin menos personal. Ta conoci cu den pasado a kita hopi trahador pa motibonan financiero cu hasta mester a pone extra cent na hospital pa cubri su gastonan e momentonan ey, cu a tuma e decision. Pero awor ta necesario pa busca mas enfermero por lo menos 30 pa cubri tur e servicionan. Actualmente tin varios Filipino pero pa motibo di e tramitacion di papel pa sali di nan pais cu ta tuma hopi tempo e ta birando dificil, mescos cu trece di Hulanda y Belgica pasobra tin scarcedad akinan mes, y Hospital ta tirando un bista pa Spaña cu tin un grupo grandi di enfermeronan sin trabao. Segun dr. Falconi hospital tin hopi mas trabao actualmente y menos cama. Pero e ta haya cu e personal ta traha cu mas eficiencia y eficacia pasobra e pacientnan ta keda menos largo na hospital. Director di Hospital a mustra cu hospital ta transparente y cu no tin nada di sconde, y trabaonan hopi bon ta sosode y tin biaha menos bon pero tur esaki tin su debido atencion. E problema na Aruba pa loke ta trata nos salubridad publico ta cu e hendenan mester compronde cu cuido medico di calidad ta costa placa y no por kere cu usando fondonan limita por logra tur cos. Den pasado hospital a wordo neglisha financieramente y no tabata tin suficiente personal ni ekipo. Awor hospital ta purba di haci mas esfuerzo posible cu menos placa y baha gasto cu ta considera no tan necesario y esey ta duna su fruto parcialmente. En todo caso, Hospital ta sigui haci su esfuerzo pa aumenta su personal y su ekipo, pero mester ta conciente cu tin cu mester paga pe, segun dr. Falconi.

Comentarionan (9)Add Comment
Hocus Spocus Pilatus Pas
December 26, 2012
201.229.73.40
Votes: +0
...

Maristela hospital pa hende grandi? Uh Uh aki tampoco no tin suficiente enfermero y pa colmo mal paga! Aki ta pone stropi rond boca y hasi uso di nan Amor pa e trabou y no ta paga nan conforme e trabou aki. Si kere CBS tin mas hende grandi na Aruba den futuro tambe! Senor Director no tuma Arubiano pa kens! Maristela NO tin ekipo pa cuido di nos grandinan djis pasobra tin un dokter y posibel un di dos, esaki no kier meen cu Maristela ta ekipa pa hospital pa e hende grandi! Of ta pesey mes kier dumpnan aya pasobra nan ta Bieuw tog?? Esey ta maneho?? Eficiencia aki lo nifica euthanasia pasivo??? of activo? A bira tempo pa enfermeronan cuminsa nan propio negoshi pafo di hospital of cuminsa negocia salarionan astronomico mescos cu e specialistanan den Hospital Aki e ley di vraag en aanbod lo bini na vigor. Enferemeronan a yega ora pa nos lanta para, sin nos NO tin Hospital.

Hocus Spocus Pilatus Pas
December 26, 2012
201.229.73.40
Votes: +0
...

No tin personal?? Anto ta bai inverti 170 miyon pa un hospital grandi grandi mescos cu Europa?? Mas edificio pa pone muebles y aparato bunita y paga friends and family den construcion, comerciante, etc.? Si awe no tin suficiente enfermeras (os) ta pasobra nunca a planea pa futuro sino si ta planea un edificio (Hospital) mas grandi di mundo? Y a trata e enfermeronan cono tercer categoria y pone mas specialista cu ta cobra 3 y 4 myon pa anja?

What's on
December 24, 2012
201.229.18.8
Votes: +1
...

Tuma ehempel di Hullanda retira como manager di HOH awor y no laga ora ta laat.

Honesty
December 23, 2012
201.229.2.68
Votes: +0
...

No money for personel,supplies but Lots to waste on unnecessary "zaalartsen and harassing Others"

N'e chambonan berde
December 23, 2012
201.229.124.216
Votes: +1
...

Awor nos ta bay importa personal di Spanja segun Falconi. Ke hubo tur e muchanan na EPB y EPI? Pakiko no cuminza un stoom cursus pa upgrade personal local y pakiko no amplia e verzorgings stream di EPB y EPI pa e graduadonan por hanja trabao na hospital? Pakiko nos ta bay IMPORTA hendenan atrobe?

Populista Rasmijn
December 22, 2012
201.229.25.60
Votes: +4
...

Eficaz y eficiente? Wel con bo kier pa cos bai bon si managernan mes ta stroba trabou wordo hasi mas mihor bringando y ctiticando cada dia e profeshonalnan cu ta para na e cama dje patient, djis pa nan probecho y capricho personal? Poco specialista cu ta bin dicta di sa tur os mihor y ta dicta kiko tur hende mester hasi pa demonstra su poder y baha su sed pa poder riba enfermeronan. Set di abusador...Falconi ta ruim op de boel? No mi shon, e ta sostene e actonan ey di varios cu tin puesto hanja via canalnan politicamente of di amistad cu contactonan prominente. Wel asina bo no ta yega na efectividad y eficaz ni aki 10 anja. Hasi limpi caminda mester hasi limpi; management gang !!!

Populista Rasmijn
December 22, 2012
201.229.25.60
Votes: +9
...

Ta yen di manager arogane den hopital cu ta cana hasi nechi y no sa ni ta compronde e trabou di e enfermeronan cu ta traha manera burico eyden. Management no sa kiko ta prioridad ora bo ta para na e cama y ta bin cu yen proyeto djis pa cana broma cu su proyecto a hanja chens pa wak luz di dia of ta cana papia nechi den bo cara sin worry cu locual e enfermeronan ta boga pe. Laga e enfermero faya, e ora si nan ta cla pa kite di trabou of ta menasa cu retiro juist cu tanten tin mester di hende. Si management mes no ta duna mihor voorbeeld, laga cai ruman. Abo cu bo managernan ta strobando e lugar bai dilanti.

rod
December 22, 2012
201.229.42.222
Votes: +4
...

E director di hospital no por mustra ningun
resultado positivo te awor. Ta papia di eficiencia
pero no por mustra resultadonan concreto. Falconi a
cuminza tira santo den wowo di comunidad....E berguenza
nacional ta yama Eerste Hulp y Falconi no ta papia mes di
porkaria di servicio aki....Eficiente y eficaz? cos di hari !!!!

What's now
December 21, 2012
201.229.118.139
Votes: +2
...

Tur caminda tin scarcedad di placa paso tin something wrong somewhere.Esei tambe ta nifica cu no tin bon management.Tin management solamente pa bisa cu no tin placa.Hende nan asina mester kita for di trabow y duna chens na esnan cu si sa...sin pone estranjero vooral hullandes paso nan no ta sinja nos hende nan nada...paso nan mes kier disfruta di nos Pais terwijl nos mes un hende nan mester busca trabow afo....

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter