Sunday, 31 August 2014
Gregory Koolman repasando anja 2012 como uno hopi exitoso mes pa Enseñanza pa Empleo Print E-mail
Sunday, 23 December 2012 10:21

Gregory-Koolman
Den un entrevista cu Gregory Koolman director di Enseñanza pa Empleo el a mustra hopi satisfecho cu e resultadonan di anja 2012 y su meta ta pa 2013 supera esaki ainda mas. E demanda pa curso tabata asina grandi cu mester a usa e reserva pasobra e presupuesto disponible no a alcanza. E feed back cu nan ta haya ta inmensamente positivo door cu a hisa hopi e nivel di lesnan y den e trend aki y ta bay hisa ainda mas nan standardnan y pa nan keda avanza manera mundo ta bay dilanti.

Cursonan cu ta haya mas studiante ta Derechonan Laboral cu ta specifico pa trahadornan di sector publico pero cu lo wordo expande pa sector priva. Ta sigui cursonan di informatica cu ta encera e.o excel y power point. E curso aki ta yudando hopi hende progresa den nan posicion administrativo. Idioma tambe tin su demanda grandi tanto Papiamento como Ingles y Hulandes cu relaciona cu e test di naturalizacion ta hayando un demanda hopi grandi. Papiamento ta gusta hopi pa personanan di otro nacionalidadnan cu a bin join nos cu kier por comunica bon cu e Arubianonan tanto na trabao como den nan circulo di amistadnan. Lesnan pa maneho di boto tambe ta hopi pidi pa piscadornan, esnan cu ta traha cu water sport, drivers di boto di turismo, esnan cu tin yate, etc. Pronto en coordinacion cu directie scheepvaart EPE lo produci un buki riba maneho di boto grandi y chikito y lo bin cu un curso pa esnan cu ta core boto cu turista cu ta algo hopi necesario. Tambe e cursonan di contabilidad, computacion, carpinteria, horticultura ta hopi gusta cerda nos mes hendenan, mientras cu idioma, waiter, bar tender y pelukeria tin mas scogencia bao di residentenan. Horticultura ta un curso cu ta bayendo hopi bon mes. El a drenta den su tercer trimester y nan a bin cu algo nobo cu ta perma cultura cu ta yuda e plantador usa tur recurso cu e ta rondona cune pa por sembra segun necesidad di e planta, si e no por ta expone na hopi solo of hopi biento y mester plante bao un mata grandi cu dune sombra, etc. Haci bon uso di awa tambe ta parti di e curso aki y e cursistanan ta haya e tips cu nan mester pa traha canalnan caminda por tin reserva di awa pa raiz di e plantanan wanta humedad. E opleiding di Sociaal Vorming a resulta hopi exitoso. Dia 14 di November e di dos grupo a haya su diploma y tin hopi plan nobo pa e cursistanan aki. Mescos e programa “Aruba Certificate” cu ta kizas esun cu mas demanda y hopi empleado publico y sector Horeca, a hacie caba y e lo wordo expande te unda e lo ta posible, mas cu mil hende a haya diploma caba na 2012. Un curso di pelukeria ta den plan y EPE a busca un salon ideal full completo unda e cursonan aki lo wordo duna, y esaki ta otro curso cu mayoria solicitante ta residente mas tanto cu Arubiano. Pa 2013 tin den plan drenta bek na KIA pa duna e detenidonan les y yuda nan rehabilita. Gregory Koolman ta kere hopi den second chance, y e ta sinti su mes hopi satisfecho cu EPE por contribui na reivindica e ser humano y integra nan den comunidad. Lo sigui e tercer etapa di Sociaal Vorming, cu ta bay di hopi bon pa hopi mehor. Otro curso nobo ta pa mamanan teeners, kiermen mamanan soltero cu no ta bayendo school y cu merece bay dilanti pa nan mes y pa nan yiu. Esaki ta un proyecto cu ta encera un pakete administrativo, cu a haya sosten di Parlamento y cu Gregory Koolman ta keda pendiente di e aprobacion di presupuesto pa start bay. E tarea primordial pa cual EPE a lanta na 1988 door di ex-prome minister Henny Eman tabata pa recapacita e ex-empleadonan di Lago despues cu nan a sera e refineria, y awor el a retoma su mision original, cu e compromiso di prepara e ex-trahadornan di valero pa drenta den e mercado laboral, entre otro Horeca. Gregory Koolman a duna di conoce cu EPE mester di mas espacio y tin plannan di expansion, pero esaki ta den un etapa hopi preliminar ainda, y e idea tras di esaki ta pa Enseñanza pa Empleo bira un Universidad di Pueblo.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter