Cliff Feldman: Nos a logra colecta 1300 co’i hunga p’e muchanan di Breezy Point

Sunday, 23 December 2012 17:48

Durante algun dia, un campaña di accion di gracia pa recauda co’i hunga a start na Aruba, bou liderazgo di Cliff Feldman, un bombero Mericano boluntario retira, cu a scoge pa biba na Aruba algun aña atras y tin un tremendo amistad y colaboracion cu e Cuerpo di Bombero di Aruba.

E resultado ta uno hopi grandi mes, ya cu a logra colecta 1300 co’i hunga. Aruba a logra briya cu e accion di gracia den ambiente di Pasco y Fin di Aña, unda cu nos como isla lo haci hopi mucha super feliz riba e 25 di december. Cuerpo di Bombero di Aruba, ATA, AHATA, A.T.S.A. y JetBlue a uni forsa y no por keda sin menciona tambe varios otro compania hotelero cu sigur a demostra nan solidaridad pa e causa aki y demostra nos sentimento humano, p’e situacion cu New York ta pasando aden. E efectonan desastroso di horcan Sandy a causa hopi daño, specialmente na e bomberonan y nan famia na North East, Breezy Point, unda cu un candela a destrui 111 cas. “Nos a logra yega na 1300 co’i hunga y esey ta danki na e generosidad di e hendenan di Aruba. Nan a wak y sinti e dolornan cu nos hendenan ta pasando aden na New York y sigur a wak e necesidad di e muchanan pa tin un Pasco bunita y feliz. E hendenan di Aruba ta worry cu nan situacion y esey New York completo lo haya sa. JetBlue lo percura pa hiba e co’i hunganan New York y ya henter e stacion di bombero na Breezy Point ta wardando masha ansioso mes, p’asina nan cuminsa lora nan como regalo y despues distribui esaki p’e muchanan. Cada mucha lo haya 3 – 4 co’i hunga y nos por ta sigur cu nan lo tin un miho Pasco, specialmente door cu nan por haya regalo manera tur mucha. E alegria y briyo cu e co’i hunganan aki lo trece p’e muchanan, ta uno enorme. Mi kier gradici henter e pueblo di Aruba, como tambe Marriott Association of Workers, cu a haci un tremendo shopping na un di e luganan di bende co’i hunga, ATA, pa su excelente cooperacion y colaboracion, JetBlue pa transporta e co’i hunganan, Aruba Time Share Association pa nan fuerte sosten, Jolley Holding, Certified Megamall, Top 1 Toys, Tao Toys, Van Dorp y De Wit Stores. Tera Group pa nan bon trabou, La Cabana, Casa del Mar, Paradise Beach Village, CMB pa set up e cuenta y miembronan di Playa Linda pa su push pa hiba e causa aki den e direccion corecto y e Cuerpo di Bombero di Aruba completo pa nan sosten y apoyo.” Esaki ta un muestra clave di e grandeza di bon curason di nos comunidad completo, cu nos ta biba cu e dolor y tristeza di hende cu nos no conoce, pero ta uni pa un bon causa, particularmente pa nos muchanan di Breezy Point, haya e dushi ambiente di Pasco, cu e regalonan di Aruba.