Friday, 19 September 2014
Uso di Restriccion/Maramento di Anciano Print E-mail
Wednesday, 09 January 2013 16:55
DSC_2063
Uso di restriccion fisico y mental serca un anciano ta un practica comun den hopi pais, tambe na Aruba. Esaki ta tuma luga den mayoría país entre otro: hospitalnan, casnan di cuido, y e asina yama casnan di sosiego pa ancianonan den nos comunidadnan den Caribe.

E forma di restriccion fisico cu mas ta ser usa ta maramento na cama y stul sera cu mesa. E metodo cu mas ta ser usa ta: uso faha, verband y rails na cama. Den mayoria caso restriccion fisico ta wordo usa den hospitalnan pa preveni caymento for di cama y fracturanan a consecuencia di esaki. Investigacionnan na Merca y Europa (Alemania, Austria, Suesia), ta indica cu e opinion principal bou enfermeronan y cuidadornan pa mara un anciano ta pa preveni cu e anciano aki cay for di cama (90%), mientras e sobra di rasonnan pa mara un anciano ta pa preveni entre otro: sali y wandro, inkietud, agression, tin problema di movecion, smeer poepoe, etc. (10%). E rason cu ta resalta den e investigacionnan aki ta; cu restricción / maramento ta wordo usa serca anciano cu tin problema cognitivo y/of cu ta dependiente di otronan pa su cuido diario, interferensia cu e tratamento medico (p.e. den caso di preveni pa e anciano ranca y saca un slang di infuus, catheter) y pa otro motibonan relata na caracteristicanan di e organización; por ehempel un staff cu experiencia vs un staff cu tin suficiente experiencia. Den e comparación aki ta resalta cu tin menos maramento di anciano den un instituto unda tin staff cu experiencia y kwalifica compara cu un staff cu no tin mucho experiencia.

Un persona cu Malesa Tipo Alzheimer (MTA) of otro estado neuro-cognitivo sa di sufri di inkietud. E inkietud aki por ta causa door di entreotro: dolor, no ta sinti su mes bon, sentimentonan di inseguridad, un infeccion, of un of otro malestar, cu e no ta abto pa describi of vocifera adecuadamente

Ora e persona aki bira inkieto ta na su luga pa evalua kico ta e origen di e inkietud aki. Aki tan a su luga pa cuidadornan desaroya un maneho adecuado prome, encuanto con pa actua den e diferente forma y kehonan cu e MTA ta presenta su mes cerca e persona y no busca refugio sin mas den un of otro forma di restriccion (mental of fisico).

Aki na Aruba ta pasa regularmente cu un famia ta bini bishita su ser keri den un instituto y pa sorpresa ta haya su ser keri mara den cama sin cu e gerensia di e instituto aki a pidi nan permiso pa haci esaki. Mayoria hende no ta na altura mes cu ta regla den ley cu e famia of esun directamente responsabel pa e anciano aki mester wordo teni na altura di tur acionnan cu tuma luga den cuido di su ser keri. Hopi ta esnan cu ta tuma e actonan aki sin mas como normal y como ordo di gerensia, dokter of verpleegster, y no ta exigi cu prome tuma decisionnan encuanto di nan ser keri, cu esaki wordo evalua cu e famia prome cu actua. Tambe sa pasa cu tin famia alerto cu lo puntra e pakico di e maramento (mental y of fisico) di nan ser keri y ta haya como contesta cu esaki ta pa e seguridad di e anciano y ta spera cu e famia guli e splicacion aki sin mas, pa dal bay cu e practicanan aki. E gulimento di e splicacion aki sin mas ta ensera cu e famia ta consenti den duna e instituto aki e luz berde pa abusa di e ley aki y sigi cu e practica (abusonan) aki cu consecuensianan cu esaki por tres ecu ne. E permiso cu e famia aki ta duna e instituto ta pone e ley den man di e instituto aki ora algo pasa. Ya cu ta cu permiso di e famia aki mes e actonan aki por a tuma luga, sin tuma na cuenta cu e medidanan aki por perhudica e salud y bienestar di nan ser keri tanto fisico como mental. Pues nunca permiti sin mas y puntra pa investiga otro alternativa y e peligernan! Famia tambe por exigi cu nan NO kier cu nan ser keri wordo mara ni frena den nan libertad den e instituto y actua conforme.

 

 

 

 

 

Den e ley Europeo ta para cu tur hende tin derecho riba libertad y seguridad. Den e Constitucion di Aruba ta poni den articulo I.2 inciso 1: “Tur persona tin derecho di libertad personal y di seguridad….”

Restriccion ta un medida cu solamente por wordo aplica si e pashent – of su representante (entreotro famia) – duna permiso pa esaki. Si e permiso aki no wordo duna y e instituto haci esaki toch, esaki ta ensera cu aki ta trata di un medida di represion (dwang maatregel) y mester wordo raporta sin mas na inspeccion di salubridad.

Si sali for di punto di bista cu no ta normal pa sera un anciano den un cuarto na yabi, of di mara e anciano aki den su stul of na cama, bou di e pretexto pa su propio seguridad, mester para keto tambe cu un pais desaroya mester haci todo por todo pa preveni cu e practicanan aki tuma luga!

Pa esnan cu toch kier pone nan ser keri den un cas di cuido, ta bon pa informa nan mes bon prome si e cas di cuido aki su maneho ta ensera maramento/restriccion mental y of fisico.

 

Maramento y su efectonan

Tin diferente efectonan peligroso di maramento cu ta wordo nombra den diferente literatura manera ulcera ocasiona pa presion, depresion, caymento, agresion y hasta morto. E heridanan, mancha blauw, cu ta surgi di e maramentonan aki ta ser ocasiona pa motibo cu e anciano den su ansiedad ta haci todo posibel pa libera su mes di e resstriccion aki.

Tanto investigacionnan na entreotro: Merca, Europa, Turkia, Australia, ta indica cu restriccionnan fisico cu ta ser usa como medida den hospitalnan y casnan di cuido ta varia entre 41 pa 64%. E cifranan aki ta conta tambe pa casononan di restriccion na Hulanda segun e investigadornan (Hamers & Huizing 2005). Den e caso di maramento sin mas di un anciano e investigacion publica pa Universidad di Maastricht aki ta conclui cu restriccion fisico mester wordo prohibi y NO ta adecua pa preveni caymento.

Algun consecuencia di maramento serca anciano ta ensera: incontinensia, decubitus (herida di cama), contractura (=ora un parti di curpa wordo forsa pa keda den un posicion unda e.o. wesonan deforma), depresion, agresion, agitacion, demoralisacion, sentimento di humiliacion y baho estima, etc.

Tambe pa motibo cu e curpa ta bira pasivo ora e anciano keda mara of droga pa un tempo largo, por observa cu e mente, ritmo di drumi y e estado di animo di e residentenan ta decai gravemente (Castle 2006, Hamers et al. 2009b; Scherder et al. 2009 ). No cabe duda cu tambe sa sosode cu ora e persona cu a ser mara pa temponan largo lo bira asina fragil cu e chens di caymento (cu fracturanan) lo subi ora e por move (cana) independientemente atrobe.

“Inspectie voor de gezondheidszorg” na Hulanda ta boga pa introduci e asina yama “Exbelt-methode”, pa elimina e uso di articulonan di restriccion den casnan di cuido. Cu e introducion aki ta ser spera cu dentro di 2 aña maramento den casnan di cuido lo pasa pa pasado. Riba e tereno aki tin desaroyonan positivo ta tumando luga bou guia di Universidad di Maastricht cu ta boga pa elimina casi tur e articulonan cu ta wordo usa pa restriccion di un persona den casnan di cuido. Un aña despues di a introduci e intervencion aki no tabatin caso di caymento cu herida y tampoco e uso di calmante (=restriccion mental) a subi den e casnan di cuido di anciano.

E grupo di Maastricht aki a cuminsa un curso di formacion pa dokternan di cas, paramedico, enfermeronan y cuidadornan den cuadro di e programa EXBELT di Universidad di Maastricht como parti di e programa di intervencion.

E metodo “Exbelt” ta consisti di diferente punta:

  1. 1.Educacion di e diferente dunado di cuido;
  2. 2.Apoyo/sosten na cuidadornan mediante un enfermero specialisa;
  3. 3.Involucra iamia den e proceso di cambio;
  4. 4.Pone hermentnan moderno disponibel.

 

Fundacion Alzheimer Aruba (F.A.A.) den su proyecto “STOP ABUSO DI ANCIANO” ta apoya e intervencion di profesor Hamers y su team di Universidad di Maastricht y otro coleganan internacional.

 

Pa cumpli cu nos constitucion ta necesario pa tin un maneho specifico riba e dependencia di nos grandinan na Aruba pa cu nan libertad personal, nan seguridad y eradicacion di discriminacion di Anciano riba tur tereno. Pues, introduci leynan cu ta salvaguardia e derechonan di nos grandinan y esnan cu Malesa Tipo Alzheimer MTA.

Pa esnan interesa pa apoya y coopera cu Fundacion Alzheimer Aruba (F.A.A.) den su lucha por tuma contacto cu alzheimeraruba@gmail.com">alzheimeraruba@gmail.com

 

Comentarionan (1)Add Comment
Oops!
January 09, 2013
67.23.232.242
Votes: +0
...

Súper bon información, spera cu tur e trahadornan den SABA a lesa e artíc*lo aki y stop di hasi e tipo di actonan aki cu pretexto cu e ta pa e anciano su bienestar. Señoranan dement den cas pa ancianonan cu ta wordo será na yabi den camber pa nan (zogenaamd) no huy. Ancianonan cu ta haya remedi Haldol (p.e.) pa bira (zogenaamd) rustig, te hasi nan suf y kens. Danki Dios cu nos ta un Famia pendiente di nos bieu. Asina mes a logranan pa nos bieu bira paralitico, mientras e tabata un hende fuerte cu ta gusta cana. Hopi erg!!!

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter