Wednesday, 01 October 2014
ATIA alerto pa algun puntonan di preocupacion di su miembronan y commercio Print E-mail
Friday, 11 January 2013 11:22

 

atia001
Na prome luga ATIA kier a extende un aña fructifero na henter pueblo di Aruba i muy particular na sector comercial i su miembronan.

Den e prome dianan di aña nos ta wak bek ariba un periodo den cual hopi a wordo haci i hopi a wordo logra. Den representacion di comercio nos a tuma e prome dianan di aña pa nos scucha algun comentario for di comercio i lo desea di trece esakinan dilanti pero tambe naturalmente papia cu es nan concerni pa mehoracion i solucion.

DOUANE

Varios di nos miembronan ta keha seriamente ariba e hecho cu tin un retraso di mas cu un siman pa ricibi nan productonan na e momentonan aki. ATIA den pasado na varios ocasion a trata di mantene e contacto i vigila procesonan di mehoracion mirando cu entrada eficaz di producto ta e ader principal di nos comercio. Ki ora cu tin retraso den e proceso aki, comercio ta sufri inmensamente i ta cuminsa protesta, mirando cu ta toca existencia di nan negoshi i empleadonan.

ATIA aworaki mester para pa su miembronan i comercio en general cu esaki ta sosodiendo i no tin informacion den ki tempo esaki lo ser resolvi. Nos ta pidi atencion inmediato pa cu esaki considerando e daño cu e ta causa na nos miembronan, clientenan i Aruba en general.

ATIA a aprecia hopi si e cooperacion cu Douane, APA i ASTEC a duna den luna di December pa asina facilita salida di producto for di nos waf.

Nos ta exigi awor si cu e situacion reinante wordo coregi inmediatamente.


SEGURIDAD

Durante aña 2012 na varios ocasion ATIA a trece dilanti su preocupacion pa cu e percepción di criminalidad creciente na nos Isla i e.o. atraco contra comercio.

Nos a ripara den final di aña un cuerpo policial cu a reacciona positivo atrobe, cu varios detencion i solucionando algun caso importante.

Drentando aña nobo nos a tuma nota di un atraco brutal ariba un famia comerciante di edad na nan cas. E reaccion for di mundo comercial pero tambe di Aruba henter tawata uno di repugio. Nos ta keda trece dilanti cu nos leynan mester duna proteccion na comercio i pueblo, i es nan cu ta tribi di comete actonan cu violencia sin respeta bida humano of privacidad di un famia mester por sinti e consecuencia di nan acto. Nos tur mester bin hunto pa haci Aruba un pais sigur. Comercio, ciudadano, gobierno, prensa, barionan y polis.

Siguridad ta un rekisito pa progreso economico di un pais i nos mester por sigura na comercio i ciudadanonan cu agresion i falta di respet pa hende no por wordo tolera na Aruba.

Nos a menciona den pasado e “revolving door” principal, na unda e idea ta wordo crea cu no tin respet pa nos leynan mirando cu sentencianan ta mucho leve i no ta duna proteccion suficiente na victima i comunidad. Por ta esaki ta un percepción, pero a wordo treci dilanti prueba si caba den pasado di criminalnan cu no a wordo castiga suficientemente. Ta parce cu tin un gran cantidad di arma na Aruba tambe. No ta tempo pa nos parlamento cuminsa propone “minimo straf” pa cierto delitonan of portación di arma?

Funcionamento di departamentonan di gobierno

ATIA ta ricibi keho ariba procesonan den cierto departamentonan di gobierno cu ta afectando desaroyo economico di nos pais i di comercio. Otorgamento di permiso di construccion i tereno ta un proceso cu ATIA ta ricibiendo keho ariba dje for di mundo comercial. Vergunning nan ta dura mucho largo i inversionnan importante hopi biaha ta keda stagna pa motibo di e procesonan aki na varios departamento gubernamental.

Nos ta un pais relativamente chikito i ta importante pa procesonan tuma luga na un manera eficiente, transparente i corecto.

ATIA ta spera di atende cu e ministerionan envolvi den esaki pa wak di ki manera por mehora procesonan cu por stagna desaroyo economico di Aruba.

ATIA tin confianza den aña 2013 pero nos mester bay traha hunto na soluciona e detaye nan cu ta stroba pa Aruba yega su maximo potencial.

Miembronan di ATIA i comercio por ta sigur cu ATIA lo keda vigila e topiconan aki i yuda di nos parti na propone solucionnan duradero pa mehoracion di funcionamento di comercio na Aruba.

 

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter