Reapertura oficial di biblioteca su edificio principal na George Madurostraat

Friday, 11 January 2013 15:52

Na september 2012 Biblioteca Nacional Aruba por a habri portanan bek di su edificio principal na George Madurostraat pa comunidad di Aruba. Pa celebra otro siman e reapertura oficial di biblioteca ta presenta un programa atractivo pa un y tur.

E edficio principal di biblioteca tawatacera pa 2 aña pa un renobacion completo. Durante e periodo aki biblioteca a presta servicio for di su sucursal na San Nicolas y Departamento Arubiana na Bachstraat. September 2012 portanan a habri bek den George Madurostraat. E edificio tin un ‘fresh new look’ cu su colornan bibo. Pa celebra e reapertura oficial hunto cu publico en general biblioteca ta presenta un programa special pa grandi y chikito den siman venidero di 14 pa 17 di januari den e edificio renoba den George Madurostraat. Un programa diverso di contamento di storia, presentacion di buki y presentacion musical.

The healthy way

Mesora cu drenta e edificio bishitantenan di biblioteca ta topa cu un entrada atractivo. Por sinta den hal y disfruta di algo di come of bebe di ‘The HealthyW way’. The Healthy Way a cuminsa brinda servicio di kantine na aña 2008 na Colegio Arubano y ta duna servicio tambe na por ehempel APFA y Universidad di Aruba. The Healthy Way ta ofrece cuminda saludabel na un prijs rasonabel.

Website

Tabata tempo pa cambia e website di biblioteca. E compania YFMG web consulting a diseña un otro website pa biblioteca. E website www.bibliotecanacional.aw ta bon bishita cu un averahe di 5000 bishitante pa luna. Biblioteca ta launch e website nobo e fin di siman aki. Biblioteca ta spera di por ofrece su bishitantenan WIFI desde otro siman. E Internetroom ta habri pa facilita personanan cu e servicio di uso di computer y busca informacion riba Internet.

Bookmarks

Na ocasion di reapertura oficial di edificio central a laga diseña un Bookmark nobo pa Biblioteca Nacional Aruba. Diseño ta di Nelson Gonzalez, artista visual. Biblioteca lo tin un bookmark pa cada bishitante den e proximo simannan. Nelson Gonzalez ta un artista visual contemporaneo cu a yega di participa na diferente exposicion, tanto local como internacional . E ta un diseño cu colornan bibo, den background un potret di un banda di e edificio di biblioteca. Riba e bookmark tin Haiku di sra. Digna Laclé-Herrera. Sra Digna Lacle Herrera ta un poeta, contador di storia y autora di e buki ‘Proverbionan’.

Texto:

Mustra grandeza

bo ta planta cu respet

y hopi amor

Buki ta saca

bo for di e tiniebla

di ignorancia.

Mucha chikito,

bo inocencia un flor

yen di fragancia

Cariño ta pa

bo habri curazon

cera amistad.

Progreso mester

di un bela y biento

pa bo nabega.

Diadomingo awor lo tin e reapertura oficial. Y di dialuna pa diahuebs lo tin un programa special pa publico en general:

Programa di dialuna 14-01-2013 pa 17-01-2013

Dialuna 14 di januari 2013

Atardi 16:00-17:00 Presentacion di e buki “De zaal van de twee waarheden” di Leo Sybrandy (E buki ta skirbi specialmente pa alumnonan di bovenbouw di scol basico)

Anochi 19:30- Apertura di exposicion di e pintor Arubiano Jenny L. Kock

Diamars 15 di januari 2013

Merdia 16:00-17:00 Presentacion di e buki “E prinses cu no kier a peña su cabey”, skirbi pa Hilli Arduin y traduci na Papiamento pa Desiree Correa y Olga Buckley.

Anochi 19:30-21:30 Anochi di conta cuenta y presentacion di un pelicula nobo di Compa Nanzi

Storyteller Amina Meeks-Blackwood (contado di cuenta Jamaica)
Storyteller Emerita Emerencia (contado di cuenta Aruba)
Presentacion pelicula nobo di Compa Nanzi “A Nancy’s Gift”

Diaranson 16 di januari 2013

Merdia 15:30-17:00 Workshop Introduccion skirbi cuenta cortico dor di Jules Marchena (condicion pa participacion: 16 aña bay ariba)

Anochi 19:30-21:30 Concierto, proverbio y mas

Presentacion buki di proverbio “tanten tin: di sr. Wini Poulo compaña pa sr. Chaco Castro
Presentacion musical di sr. Jules Marchena (musico di Corsou)

Diahuebs 17 di januari 2013

Merdia 16:00-17:00 Contado di cuenta Amina Meeks-Blackwood di Jamaica

Anochi 18:00-19:30 Presentacion di Club di Movimiento (ballet di Aruba) bou direccion di sra. Samantha Westera

Diabierna 18 di januari 2013 Biblioteca Nacional Aruba na Oranjestad y San Nicolas ta cera pa publico en conexion cu celebracion di ‘Dia di Biblioteca’. Esaki ta un celebracion anual di tur empleado di Biblioteca Nacional Aruba.