Friday, 28 November 2014
A haya 888 peticion pa casamento entre Arubiano y stranhero den 2012 Print E-mail
Thursday, 31 January 2013 21:54
Comparti

Josephine Nouel002

Den combersacion cu sra. Josephine Nouel, hefe di departamento di registro di datonan di Censo, a keda constata cu den mayoria di e casonan di registra, e cifranan a keda mescos, cu excepcion di e caso di parehanan Arubiano (Hulandes) cu kier of a casa cu un stranhero. Burgerlijke Stand ta un departamento cu ta registra personanan cu a nace of cu a bin biba na Aruba, pero tambe casamento, divorcio y fayecimento.

Personanan Hulandes cu kier casa cu un stranhero, Burgelijke Stand ta haci un evaluacion si e ta un matrimonio di berdad of ficticio. E cantidad di e ultimoo casonan aki a bira basta halto ultimo tempo, segun sra. Nouel. Pa loke ta casamento di personanan local of turista, e cifranan ta mustra cu na 2011 tabatin 803 casamento (364 tabata turista) mientras cu na 2012 esaki tabata 841 (di esaki 316 tabata turista). Turista ta esnan cu no ta biba na Aruba y ta bin solamente pa realisa e ceremonia riba e isla. E cifra di fayecimento ta mustra cu na 2011 esaki tabata 679 y aña pasa e tabata 633. Den e cantidad di nacemento tampoco tabatin hopi diferencia si mira cu na 2011 un total di 1254 baby a nace y aña pasa tabatin 1313 nacemento. Unda si Censo a nota un crecemento grandi toch ta den e cantidad di evaluacion di matrimonio cu Censo ta haci. Esaki ta wordo realisa ora cu un Arubiano kier contrae matrimonio cu un persona di otro nacionalidad. E evaluacion aki ta wordo haci pa sigura cu e persona stranhero no ta haci uzo di e matrimonio pa haya un status mas permanente na Aruba. Na 2011 a wordo entrega 413 peticion pa un evaluacion di parehanan Arubiano - Stranhero cu kier casa na Aruba of a casa den exterior y kier inscribi nan matrimonio na Aruba. Na 2012 esaki tabata 888, pues dobel di e cantidad anterior. Di otro banda e personanan cu ta casa den exterior a keda practicamente mescos, esta 195 y 231, 2011 y 2012 respectivamente. E aumento grandi tabata di esnan cu kier casa na Aruba di e grupo ya menciona, cu tabata 218 na 2011 y 657 na 2012. Ta trata principalmente matrimonio di un Arubiano (Hulandes) cu un stranhero kende su permiso a vence, permiso a caduca of no tin permiso mes. Pues e crecemento den e grupo aki tabata grandi. Esaki a trece cune cu e lista di espera a bira basta largo pa esnan cu kier casa. Pa siman ta realisa entre 12 y 14 entrevista na e parehanan, cu ta tuma luga den oranan di mainta. Cada un di e pareha ta wordo entrevista y mester ta presente hunto. Despues di e entrevista, si tur cos bay bon, den algun par di dia ta anuncia e decision na e pareha. Si tin suficiente prueba cu e personanan en realidad no conoce otro, e peticion ta wordo rechasa. E ambtenaar ta traha su relato, entrega y discuti cu e hurista. Den un carta ta splica e motibonan pakico e peticion a wordo rechasa. Den caso di parehanan cu a casa den exterior ta pasa e mesun procedura y e sali negativo, e decision ta cu no ta inscribi e matrimonio na Aruba. Segun sra. Nouel, aunke e cantidad di casonan no ta hopi, ta sosode cu e conseho ta sali negativo. Den caso di duda, no por nenga e peticion, pero ta haci un her-controle y her-onderzoek. E pareha of futuro pareha cu haya un contesta negativo, por entrega un obheccion na LAR. Actualmente CENSO tin cuater (4) ambtenaar cu ta haci e entrevista na e parehanan. Cada siman tin un persona cu ta encarga cu e entrevista. Den oranan di atardi e ambtenaar ta traha riba inscripcion y revision di e documentonan. Tambe si tin casonan cu a wordo rechasa, nan ta uza e merdia pa traha nan relato. Pesey e ta admiti cu esaki ta trece cierto presion, pasobra e otro ambtenaar tin cu haci e otro inscripcion di nacemento, divorcio y fayecimento. Y otro grupo ta traha riba inscripcion di e hendenan cu a bolbe bin biba na Aruba.

Comentarionan (1)Add Comment
djodjo
February 01, 2013
201.229.50.182
Votes: +2
...

Aruba ta pesta ku stranjero ta kiko boso ta verwacht??? soooo boring news!!

Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter