| Centronan Deportivo Jara y Simeon Antonio a bira victima di vandalismo |
 |
 |
| Monday, 18 February 2013 11:12 | ||||||||||||||||||
 E ultimo dos simannan aki usuarionan di Centronan Deportivo Jara y Simeon Antonio y e team encarga cu centronan deportivo na Aruba a topa cu un sorpresa masha desagradabel, ora a nota cu nan a bira victima di vandalismo dos biaha tras di otro.
E situacion aki a causa hopi disgusto cerca e usuarionan y esunnan cu ta percura pa e mantencion y maneho di e centronan. Desconocinan a skirbi cu marker riba e autonan di e damanan kende ta bay les di Zumba anochi na e centro di Jara y tabata stroba e lesnan. Tambe nan a susha e murayanan cu marker. Ademas di e mal comportacion y sushamento di propiedad cu no ta di nan, e vandalistanan no a horta nada. Na Simeon Antonio e vandalistanan a bay mas leu, causando daño mas grandi na e edificio. Nan a tira piedra y destrui e bentananan di e facilidad den fin di siman di Carnaval Grandi. E facilidadnan aki ta wordo uza pa diferente scol y grupo di ehercicio, como tambe pa entrenamento di diferente deporte. Cualkier daño y destruccion causa na e centronan aki ta perhudica tur e usuarionan aki. Loke a pasa na e facilidadnan deportivo di Jara y Simeon Antonio ta inaceptabel. E team di maneho ta pidi mayornan pa yuda conscientisa nan yiunan tocante vandalismo y subraya cu ora nan haci daño na facilidadnan deportivo, nan ta haci daño na nan mesun bario su desaroyo y ta daña e ambiente den nan bario. Tur dos facilidad deportivo ta haya mantencion continuo y regular. Den caso por ehempel di Centro Deportivo Jara, na november 2012 el a caba di haya un mantencion grandi. Aña pasa Fundacion Facilidadnan Deportivo cu ta resorta bou di Ministerio di Salubridad y Deporte a inverti 1.2 miyon den mantencion di complehonan deportivo. Ta tristo e ora pa constata cu nos mesun hendenan specialmente nos hobennan cu por haci bon uzo di e centronan aki, ta causa destruccion. Esunnan encarga cu mantencion y maneho di e facilidadnan deportivo ta haci un apelacion na nos comunidad pa yuda tene nos facilidadnan bunita y pa si acaso ta nota cualkier hende causando daño intencional na e facilidadnan pa por fabor avisa polis.
Comentarionan (2)Mustra/Kita comentarionan ...
Mi ta di Savaneta y ta bida eybanda, Tin hopi mucha jong ta sinta eynan ta usa droga den dia cla y anochi. Mi a jega di bel polis caba pero nanda no ta wordo haci. Y mayoria di e muchanan cu ta usa droga eynan ta bow 20 ana. Pesey ta un motibo cu mi a stop mi jui di practica deporte eynan.
,
February 18, 2013
Duna Comentario y/of Comparti riba Social Medi |
Mustra/Kita e formulario di comentario
