Tour Cultural 2013 ya caba a start motor

Monday, 18 February 2013 16:50

UNOCA ta informa cu ya caba a start motornan, cla pa ranca sali cu Tour Cultural 2013. Conhuntamente cu tur diferente partnernan di e Tour Cultural, esta Departamento di Cultura Aruba, Museo Arqueologico Nacional Aruba, Museo Historico Aruba, Arubiana/Biblioteca Nacional Aruba, Archivo Nacional Aruba, Cas di Cultura, Departamento di Enseñansa Aruba y Arubus, ta cla pa ofrece tur klasnan di segundo grado di scolnan secundario un oportunidad unico pa experiencia e Tour Cultural.

Aña pasa caba a tuma luga e prome Tour Cultural pa nos hobennan di scolnan secundario. Esaki a tuma luga den cuadro di celebracion di 25 aña di existencia di UNOCA.

Cu hopi satisfaccion UNOCA y tur partnernan ta wak bek ariba un Tour Cultural cu a logra su metanan primordial, esta di informa/educa nos hobennan ariba e area di cultura y stimula cooperacion entre scolnan y instancianan cultural. Den un periodo di 2 luna (parti over di un total di 23 dia di Tour) alrededor di 700 hoben a haya e oportunidad di cera conoci y experiencia seis diferente instancia cultural den un mainta.

A base di e exito aki y consciente di e necesidad y e importancia pa sigui cu e educacion cultural di nos comunidad, UNOCA a tuma e decision di ofrece scolnan secundario e Tour Cultural e aña aki atrobe.

UNOCA ta gradici tur e partnernan den e proyecto aki pa nan participacion y bon cooperacion. Cu e cooperacion estrecho aki a logra di ofrece un pakete amplio na nos hobennan.

No por keda sin menciona e participacion di cada scol pa cu e proyecto aki. Sin e participacion aki e tour no lo por a tuma luga. UNOCA y partnernan ta gradici tur scol pa cu e confiansa duna pa cu e proyecto, pa a mira e importancia y relevancia di e Tour Cultural y pa a ricibi e oportunidad aki cu man habri. E participacion activamente y yen di entusiasmo di cada scol, nan alumnonan y docentenan a conduci grandemente na e exito di e proyecto aki y seguramente ta duna e empuhe necesario pa cu e siguiente Tour Cultural.

E aña aki e Tour Cultural lo bay start mas trempan, esta entrante diamars dia 26 di februari, dunando asina mas scol e oportunidad pa participa. Manera aña pasa, e tour lo ta specialmente pa e alumnonan di di dos grado di scolnan secundario. Lo reserva atrobe tres dia den siman pa e Tour Cultural, esta diamars, diaranson y diahuebs. Dependiendo di e grandura di e klasnan, sea un of dos klas por participa pa biaha.

Ya caba e invitacionnan a cuminsa sali pa e diferente scolnan secundario participa cu e Tour Cultural 2013. Pa mas informacion y/o pa haci reservacion pa cu e Tour Cultural, por tuma contacto cu UNOCA na number di telefon 583-5681 of por e-mail na mlee.unoca@gmail.com.

Potretnan di Tour Cultural 2012 por wordo aprecia ariba e website di UNOCA, www.unocaruba.org . Continuamente lo sigui agrega e potretnan nobo. Por bira amigo tambe di UNOCA ariba facebook (UNOCA Aruba) pa asina keda na altura di e Tour Cultural y otro actividadnan cultural di Aruba.