| Grupo Scout Casibari a ricibi Minister Otmar Oduber calurosamente |
 |
 |
| Monday, 18 February 2013 18:14 | |||||||||
|
Diasabra atardi Minister Otmar Oduber tabatin e honor di ta invitado di e Grupo Scout Casibari Jan Lobbrecht. Tur e scoutnan for di chikito te grandi a duna e mandatario un caluroso bon bini y a dune un demostracion di tur nan practicanan. Minister Oduber a haya oportunidad di wak con nan ta siña cushina riba fogon for di scratch practicamente. Tambe el a haya pa purba pan y bolo traha riba e fogon. E scoutnan orguyosamente a mustra e minister con pa lanta un tent mustrando asina con nan a siña e diferente practicanan di supervivencia. Minister Otmar Oduber a keda hopi contento y entusiasma cu tur loke e grupo di hobennan aki a demostre y siñe. El a indica cu e ta sumamente contento cu e diferente gruponan scout den comunidad y esun di Casibari, cual ta un di e gruponan mas grandi, sigur ta un ehempel pa nos mucha y hobennan. Como Minister encarga cu Agricultura y den cuadro di e proyecto di 10 mil mata rond Aruba, Otmar Oduber a acorda cu e tereno di Grupo Scout Casibari lo ricibi un total di 25 mata di fruta pa wordo planta riba nan tereno. Di e forma aki nan tereno ta wordo embeyeci, mientras cu nan ta contribui na nos medio ambiente y ta disfruta di e diferente frutanan cu por wordo cosecha na Aruba. Na final di bishita di Minister Otmar Oduber Grupo Scout Casibari a gradici e mandatario pa su bishita na nan manera unico y cu hopi entusiasmo.
|
Mustra/Kita e formulario di comentario
