Resultado di e di dos ‘Gran Dictado di Papiamento’

Tuesday, 26 February 2013 15:13

Diasabra 23 di februari 2013 a tuma luga e di dos ‘Gran Dictado di Papiamento’ na Cas di Cultura. A cuminsa cu actividad aki aña pasa y e aña aki cu a keda proclama Aña di Papiamento no por a laga e actividad aki un banda. Comision Aña di Papiamento cu sosten di Departamento diCultura,

Departamento di Enseñansa Aruba, Grupo di Corector Papiamento y Fundacion Lanta Papiamento a uni un biaha mas pa realisa e magno evento aki
Minister di Economia, Asunto Social y Cultura Sra. Hooyboer-Winklaar a habri e anochi aki den e sala di exposicion di Cas di Cultura saludando tur e participantenan y deseando nan hopi exito cu e dictado.

Despues a sigui e dictado den e sala di exposicion yena cu participante. Esaki a demostra cu tin un interes grandi pa nos idioma Papiamento. E aña aki 56 persona a tuma e reto di participa na e dictado cual riba su mes no tabata nada facil. Participante di varios nacionalidad y hende di tur edad cuminsando for di 10 aña, a midi nan conocemento di skirbi un bon Papiamento den 6 frase pica. E aña aki e autor Quito Nicolaas a skirbi e texto di e dictado y Ramon Todd Dandaré a tuma na su encargo pa lesa esaki.

Por a nota con e participantenan tabata den un tension y concentracion completo pa haci nan maximo esfuerso pa sobresali den e competencia aki. E publico presente den e sala grandi tambe por a sigui e dictado den e sala grandi como cu Cas di Cultura a percura pa imagen riba un pantaya grandi y zonido for di e sala chikito.

Mientras un team di docente, trahado di Departamento di Enseñansa y corectordi Papiamento tabata haci e trabou di coreccion di e dictado, e programa a sigui den sala grandi.

E artista hoben Eleen Rasmijn compaña pa Siegfried Harms a presenta un poesia ritmico cu yama “ Papiamento” compaña pa Taissia Aileine (baile) Luis Fernando Restrepo (pintura) y Germine Acosta (teatro); tur esaki bou di encargo di Jhon Freddy Montoya. Rachel Kraaijvanger a deleita e publico cu su bunita canto na Papiamento. Osvaldo Correa tambe a presenta e obra ‘Regla cuenta’ cu cual el a gana aña pasa den Arte di Palabra.

Despues a sigui presentacion di un buki nobo di Sr. Napoleon ‘Poy’ Wester. E obra ta titula ‘Recuerdonan pa keda’ y e ta trata un compilacion di varios obra di Sr. Napoleon ‘Poy’ Wester. Poy a haya inspiracion pa compone poema riba celebracion di fecha natal di su coleganan como recuerdo. Despues el a cuminsa haya peticion pa skirbi pa otro evento tambe, p.e. Dia di Tata, Dia di Mama, terminacion di trabou, reconocimento di calidad, Siman di Housekeeping. Dia di Himno y Bandera, mensahe di Pasco y Aña Nobo y pa varios encuentro chistoso cu e bishitantenan. Tambe Poy a skirbi pa recorda algun difunto.

Prome cu a anuncia esnan cu a gana den e competencia di dictado, Ramon Todd Dandaré a trata hunto cu e participantenan y publico presente e frasenan di dictado. Despues a anuncia e ganadonan di e di dos “Gran Dictado di Papiamento”:
na di tres luga a keda Sr. Angelo Angela, na di dos luga Sr. Frank Williams y na prome luga Sra. Mayra de Graaff, cu por cierto aña pasa caba tawata den e ganadonan.

Masha masha pabien na tur esnan cu a participa y tambe na e ganadonan. E comision organisado ta spera cu otro aña tur e participantenan di e aña aki lo participa atrobe y cu mas hende mas hende lo tuma e reto di participa.