Thursday, 30 October 2014
TOPA ta kere cu reunion Minister Dowers no tabata en vano Print E-mail
Tuesday, 26 February 2013 22:21

front

Sindicato TOPA ta haya cu e reunion cu Minister di Husticia Arthur Dowers no tabata en vano, ya cu a logra concreta varios di e 14 puntonan di preocupacion cu nan tabatin, segun e Presidente Rene Bernabela. E reunion cu a tuma luga ayera den oranan di merdia pa atardi, a dura basta largo, segun Bernabela, pasobra a atende varios punto.

A keda palabra na final cu Diahuebs awor, TOPA lo sinta na mesa cu Management Team di KIA pa discuti den lineanan grandi e aspectonan di importancia. For awor caba Bernabela a bisa cu lo informa Management Team cu ta duna nan cierto cantidad di tempo pa traha riba e puntonan y si no tende nada, no ta exclui cu e trahadonan lo bandona trabou atrobe. E sindicalista a bisa cu den e reunion cu Minister di Husticia a bisa e mandatario cla y raspa cu ningun hende por kita e derecho di e trahadonan pa bay den accion na momento cu nan ta tin un disgusto. “Mi ta kere cu nan a respeta esey.” Pa loke ta e otro puntonan di pago, manera e continu-toelage y overtime cu no a wordo paga den salario, el a priminti TOPA su delegacion cu e lo duna un contesta diaranson, ya cu ta temanan cu e tin cu papia cu Departamento di Finanza. E mandatario, segun Bernabela, den e reunion a expresa sorpresa cu esnan cu ta traha na departamentonan uniforma, manera KIA, no ta hayando nan continu-toelage for di november. Ta trata di un suma di 180 florin pa luna. E parti di hygiene, seccionnan cera, asunto di malesa door di raton y djaca cu ta core rond, e lo tuma contacto cu departamento di BGD pa haci un inspeccion den KIA. Pa loke ta e caso di e colega di sindicato TOPA cu a wordo agredi door di un miembro di Management Team, lo bay papia cu e persona en cuestion riba e asunto. TOPA na final di e reunion a bay direccion KIA pa informa tur e trahadonan resultado di e reunion. Tin di e puntonan, cu e mandatario a bisa ta cosnan cu e tin control y no ta su persona mester follow-up riba e asuntonan ey. “Pero nos ta bisa pakico bo ta warda te ora e problema bira manera un hooiberg y djey busca solucion.” E mandatario a bisa nan cu e no ta compronde pakico di e accion diamars mainta y nan a contesta di nan banda di con departamentonan di Gobierno y instancianan concerni no a traha den forma preventivo y a referi na BGD, Finanza y Recurso Humano cu no a traha riba e puntonan cu no ta cosnan di awor. E ta kere cu como Minister of Gobierno mester bati na porta di e departamentonan reclamando dicon a warda pa e accion tuma luga pa actua.

gallery1 gallery1 gallery1

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter