| Exitoso Caribbean Island Marathon Cruise |
 |
 |
| Wednesday, 27 February 2013 08:30 | ||||||
 Diahuebs 21 di februari ultimo a tuma luga e Caribbean Island Marathon Cruise cu un cantidad di mas o menos 35 partisipante cu a bin specialmente pa core y cana un distancia di 12 kilometer.
Meta di e grupo aki ta durante di na biahe riba crusero pa bishita diferente isla den caribe y core of cana un distancia riba cada isla pa asina na final di nan biahe nan completa e distancia di un marathon cu ta 42 kilometer. Pa exactamente 9or di mainta nan a start for di Arashi Beach y bai direcion Fishermen's Hut y regresa bek Arashi pa sigi bai pa Light House. For di Light House nan por admira e bunita paisahe y di eynan na a baha bek y bai direcion di duinen. Nan a crusa e duinen y core canto di costa y asina tambe nan por a admira nos naturalesa y bunita lama, pa despues bin termina riba nos bunita beach na Arashi. Apesar di e solo cayente y calor tur e 35 partisipantenan a termina nan careda exitosamente y na final nan a disfruta di un dushi banjo na lama y asina refresca di e calor.
Nos bishitantenan tabata hopi impresiona cu e bunitesa di nos isla y nan tabata gaba con limpi nos isla ta. E lidernan di e grupo John Bingham y Jenny Hadfield a confirma cu nan ta regresa otro anja cu un grupo di coredo y canado.
Directiva di Arruwac ta gradici The Palm Tours cu a percura pa transporta e grupo aki bek pa e Cruise Terminal y tambe na Aruba Aloe Balm, Holiday Inn Aruba, Balashi Chill,AWA y Aruba Tourism Authorities pa nan contribucion. Na nos Cuerpo Policial Motorisa hunto cu Aruba Medical Assistance cu, manera semper, ta hasi un tremendo trabou durante eventonan, percurando asina pa e seguridad di cada partisipante.
|
Mustra/Kita e formulario di comentario
