Saturday, 25 October 2014
Sr. Ripoldo Croes, baluarte di Piedra Plat: Mi ta traha pa otro hende nan yiu, mi ta traha pa e bario Print E-mail
Thursday, 07 March 2013 20:47

front

Accion di Bario a tuma luga ayera diahuebs, mescos cu tur siman. Den e caso aki a toca turno na e bisindario di Piedra Plat pa ricibi e presencia, atencion y asistencia di Prome Minister Mike Eman y su ekipo. Hunto cu e bishitanan, a haci entrega di un plakkaat di merito na e baluarte di bario, den persona di Sr. Ripoldo Croes.

Prome cu entrega, Prome Minister a topa cu Croes na e veld di baseball cu ta hiba su nomber pa supervisa e trabounan di construccion di e muraya pa cura di e facilidad. Aki, Sr. Ripoldo Croes a conta di e caminda cu el a cana, pero cu satisfactoriamente a resulta den e mehoracion di e tereno di little league. Emociona pa e presencia di Prome Minister, su bon curazon y trabou duro pa nos isla, Croes a expresa na esnan presenta cu “Boso ta cana cune den bario tur siman, pero mi ta spera boso compronde pa mi. Pa mi awe ta un honor hopi grandi.” Ripoldo Croes ta un di e habitantenan cu mas grandi den Piedra Plat. Naci dia 7 di juli di 1939, Sr. Ripoldo Croes ta casa cu Sra. Angelica Croes. For di e matrimonio aki cu a cumpli su 50 aniversario recientemente, a nace 2 yui muher cu a dun’ e 4 nieta y 1 nieto. Despues di a traha den Lago Oil & Transport Co.; Chemical Plant N.V.; Texas Instruments; Economische Zaken Aruba; Hulpbestuurskantoor Piedra Plat; y Hulpbestuurskantoor San Nicolas, awendia e ta un pensionado. Pero leu di sinta keto na cas ta lesa corant of wak pa mata, Ripoldo ta keda activo den su pasionnan deportivo y social. Es mas, el a conta cu su dokter mes ta conseh’e pa e sigui cu su actividadnan, na luga di keda cas. Entre su meritonan mas destacante na nivel social, por menciona su sosten y trabou pa deporte di futbol; deporte di beisbol Litte League; como fundado di ekipo ‘Britannia’; y iniciador di un Centro di Bario Piedra Plat, cu mas laat a bira Piedra Plat Entertainment Center’. Como parti di Accion di Bario cu Ministerio di Asuntonan General lidera pa Prome Minister Mike Eman ta realisa semanalmente, ta duna honor na un persona den e bario cu a destaca pa su trabou na beneficio di su comunidad. Den e caso di Piedra Plat, a scoge Sr. Ripoldo Croes. Apesar cu e no ta un desconoci pa su biciñanan, pa su bario y pa henter e isla, toch a sinti cu nunca elogio y reconocemento ta di mas. Mas ainda ora ta trata di un hende cu a aporta asina hopi di su mes pa su pais, den diferente tereno. “Mi ta traha pa otro hende nan yiu, mi ta traha pa e bario,” Croes a bisa na dado momento pa purba na splica su sinti di boluntarismo, algo cu Gabinete Mike Eman ta admira masha hopi y ta spera cu Sr. Ripoldo lo por sirbi di ehempel pa hopi hende. Sr. Ripoldo Croes tin un curriculum basta extenso. El a cuminsa ta traha na Lago, despues na Chemical Plant NV. Poco prome cu el a drenta politica tambe el a traha na Texas Instruments na Korsou. Hunto cu 2 otro colega, Sr. Croes tabata un di e prome personanan cu a yuda forma e prome Departamento di Economische Zaken di Aruba. Despues Ripoldo a yuda lanta e hulpbestuurskantoor di Piedra Plat unda el a traha pa varios aña y prome cu el bay cu pension el a traha na hulpbestuurskantoor di San Nicolas. Solamente esnan involucra den e plannan di e tempo ey sa cu ta Ripoldo Croes tabata e prome persona cu a bin cu e idea pa lanta un centro di bario pa Piedra Plat y pa cual el a inicia trabounan. Na caminda, e plannan a cambia, pero toch e bario a haya un facilidad multi funcional cu ta conoci como ‘Piedra Plat Entertainment Center’. Den politica tambe Ripoldo Croes tabata hopi activo. Entre otro e tabata candidato riba lista di AVP na di e partido berde bou liderazgo di Shon A Eman durante decadanan 60. Despues di eleccion den cual el a comparti lista hunto cu entre otro Betico Croes, el a keda activo den directiva di e partido y awendia ta un miembro honorario. Ripoldo Croes ta resalta den deporte pa su amor, dedicacion y iniciativa. Tempo cu Ripoldo Croes tabata mucha e tabata gusta hunga futbol. E tempo ey tabatin diferente team di futbol den bario y den weekend nan tabata competi contra otro pa mira ken ta gana e trofeo cu e tempo ey tabata un caha di refresco. E tereno di hunga no tabata conoce mucho cos; palo di goal por ehempel tabata wordo marca cu piedra. Pero e pasion pa e deporte tabata compensa e falta aki completamente. Despues di tempo y cu apoyo di coleganan di trabou di Lago, Ripoldo Croes a lanta teamnan oficial pa hunga den Arubaanse Voetbal Bond. Un orguyo mayor di Ripoldo ta ‘Britannia’, e team di cual su persona ta e fundador. Otro deporte cu Ripoldo a duna bida den Piedra Plat ta esun di beisbol. Na 1971, ora cu ainda wega di beisbol practicamente no tabata conoci den bario, Ripoldo a yuda lanta un team di little league. Cu tempo y hopi esfuerso di su parti, e team aki a haña un bon nomber dor di a gana varios campeonato. E bon nomber ey a inspira confiansa den sponsornan cu entre otro a duna nan aporte economico y poco poco a traha un ballpark den e bario. Awe ainda e ballpark aki cu ta hiba nomber di “Ripoldo Croes Little League Ballpark Piedra Plat” ta existi y ta funciona bou di un fundacion cu e mesun nomber. Den e deporte aki el a entrena varios deportista cu a yega masha leu mes, entre nan Eugene Kingsale, Xavier Bogaerts. Ripoldo, cu un disciplina grandi y amor pa deporte, a traha cu masha hopi mucha di bario, semper buscando un manera pa duna forsa na esnan mas zwak. Den un trayectoria di 34 aña el a logra forma sigur un cantidat di 19 campeon pa Aruba y biahando tur rond di mundo el a sa di representa Aruba su Little League. Algun di e teamnan fuerte cu ainda e ta corda ta por ehempel Cauchos General di Dakota, Libby’s di Pos Chikito, Lipton’s Tea di Piedra Plat, Blue Village Hotel y Quick Electric Service. Como pensionado, Sr. Croes ta conta nos cu awor e mas ta ocupa cu antes ora e tabata traha. Ainda e sa biaha den reprensentacion di Little League. Aña pasa Ripoldo a cumpli 40 aña den Little League, un merito cu a wordo celebra tur afo y di cual su persona a gosa masha hopi. Diahuebs mainta, den presencia di famia y amigonan, Sr. Ripoldo Croes a ricibi un plakkaat for di man di Prome Minister Mike Eman como e baluarte di bario di Piedra Plat cu gobierno di Aruba ta reconoce pa su trabou boluntario di hopi aña; un trabou desplega cu hopi amor pa su bario, pa deporte y pa Aruba. Na e momento ey, hopi emociona, el a bisa “Mi ta hopi contento pa ricibi e plakkaat aki. Tur e otronan mi mester a bay afo pa haya nan. Esaki mi ta hay’e den mi mesun cas.”

gallery1 gallery1 gallery1
gallery1   

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter