Tuesday, 21 October 2014
Minister Hulandes Lilianne Ploumen di Negoshi di Exterior: ,,Nos kier facilita e proceso pa companianan Hulandes por establece nan mes na Aruba”. Print E-mail
Friday, 08 March 2013 17:27

Het beste van twee werelden 02

Aña pasa Minister Lilianne Ploumen a guia un delegacion comercial di mas di 150 compania Hulandes pa Brazil. Riba su invitacion Prome Minister di Aruba Mike Eman a biaha cu e delegacion aki. E mandatario Hulandes ta wak bek riba e mision exitoso aki y riba un futuro cooperacion cu Aruba.

Bou bo guia un mision comercial a biaha pa Brazil na november aña pasa. Kico tabata e motibo pa invita Prome Minister Eman pa participa den e mison aki? "E mision comercial pa Brazil tabata specificamente un mision di Reino. Banda di delegadonan di Hulanda a participa tambe esnan di Aruba, Corsou y Sint Maarten. Mi a mira un balor adicional grandi den participacion di e parti Caribense di Reino. Asina Prome Minister Eman por ehempel por a lobby pa e sector di Turismo di Aruba.

Prome Minister Eman tin e ambicion pa posiciona Aruba como e gateway pa Latino-America pa negoshinan Hulandes/Europeo. Con bo ta wak e ambicion grandi aki di un isla chikito?

"Ora bo biaha hunto, semper bo tin tempo pa intercambia di pensamento cu otro. Prome Minister Eman y ami a papia extensivamente riba e oportunidad y retonan pa Aruba. Mi tin admiracion pa e ambicion di Aruba pa bira un hub economico entre Europa y Latino America. Aruba, Latino America y Europa por beneficia so di esaki”.

Abo ta mira un balor adicional di Aruba pa Hulanda c.q. comercio Hulandes pa loke ta mercadonan Latino Americano?

"Prins Willem-Alexander a bisa esaki durante e mision pa Brazil di e siguiente forma. ‘The Kingdom of the Netherlands is a Latino country too’. Asina ta tambe. Nos Reino no ta solamente den Europa, pero den e region Caribense tambe.

Esaki ta brinda nos e oportunidad pa combina e miho di dos mundo. Laga nos gara e oportunidad ey. Dor di entre otro amplia y utilisa e funcion di brug di Aruba entre Europa y Latino America. Negoshinan cu kier bay Latino-America, por uza Aruba como ‘proeftuin’ of como punto di distribucion. Sectornan cu ta bin na remarke ta entre otro energia. logistica, aviacion, e sector di duna servicio y naturalmente turismo”.

Abo of bo ministerio por hunga un rol den realisa e ambicion di Aruba pa posiciona su mes como gateway?

"Nos ta sostene Aruba unda y te con leu nos por. Aruba por haci uzo di nos instrumentonan pa loke ta promocion comercial, dor di por ehempel participa na misionnan comercial. Banda di esaki nos kier facilita e proceso pa companianan Hulandes por establece nan mes na Aruba. Awor companianan Hulandes mester pasa di un loket pa otro pa inscribi nan mes. Dicon no regla tur asunto na un solo bali, manera na Hulanda na Camara di Comercio, servicio di impuesto etc.? E peso administrativo mester baha”.

Bo ta mira banda di participacion na misionnan comercial otro posibilidadnan di cooperacion cu Aruba?

"Mi ministerio tin un red postal mundial cu ta na servicio di henter Reino, dus di Aruba tambe. Nos embahadanan por mustra companianan den Latino-America riba e posibilidadnan cu Aruba ta brinda como hub pa Europa. Arubianonan conoce e cultura Latino Americano y Europeo. Hopi di nan ta papia tanto Spaño como Hulandes. Esaki ta haci nan unico”.

Con bo ta wak bek riba e participacion di Eman na e mision comercial pa Brazil?

"Na Brazil nos tur a anda hopi cu otro. Tur participante, tambe di Aruba, Corsou y Sint Maarten a aporta y a yega na resultadonan concreto. E parti Caribense di Reino por a promove e oportunidadnan riba tereno di turismo.

Na São Paulo Prome Minister Eman a papia cu e compania farmaceutico Cristalneo. Premier Eman ta mira oportunidadnan pa companianan di Aruba produci of distribui remedi di Brazil. Gobierno di Aruba tin e luna aki un reunion cu un delegacion di Brazil riba e topico aki. E delegacion bou guia di e Minister di Salubridad di Brazil ta bin Aruba specialmente pa e reunion aki”.

Bo por a forma un imagen di e economia di Aruba den bo contactonan cu Prome Minister Eman?

"Prome Minister Eman y ami a papia di esaki durante e biahe pa Brazil. El a papia cu mi di e oportunidadnan di Aruba como gateway y tambe a menciona ehempelnan di companianan Hulandes cu a establece nan mes na Aruba pa for di eynan tuma e chens pa drenta Latino-America. TNO Caribe na Aruba a haya encargonan di Colombia. Schiphol ta uza Aruba como punto di salida pa Latino America. Tur ta oportunidadnan bunita pa Aruba. Banda di esaki e pais ta para dilanti retonan grandi. E refineria mester a stop su produccion. Premier Eman ta sinti su mes personalmente conmovi cu e retiro di e casi 500 empleadonan. E ta haci su best pa yuda e hendenan aki haya un trabou lihe atrobe”.

Bo ministerio ta envolvi cu e conferencia ‘Europe meets the Americas’ cu ta wordo teni na Aruba di 5 te 8 di mei. Kico e envolvimento aki ta?

"Asuntonan Exterior ta yuda activamente pa entusiasma mas tanto compania y negoshinan Hulandes pa participa na e conferencia aki. Mi a bisa caba: Eynan e oportunidadnan ta pa e companianan Hulandes.

Cua impresion Prome Minister Eman a laga atras cerca bo?

"Mike Eman ta un homber masha inspirativo kende cu masha entusiasmo ta lucha pa e prosperidad di Aruba y ta mira Aruba como un pilar sigur dentro di Reino. E ta un homber cu un espirito comercial cu ta haci todo por todo pa combati e crisis economico. Haciendo esaki e no ta perde for di bista e aspectonan social y comunitario. Su obhetivo pa converti Aruba den un economia completamente berde, completamente CO2 neutral ta muestra di un tremendo ambicion!”

Bo tabata conoci cu e parti Caribense di Reino prome cu bo a guia e mision comercial? Y bo a ahusta e imagen cu bo tabatin?

"Mi a bira minister di un ministerio di Reino. Mi ta hopi al tanto di esaki. Aunke cu mi no ta un minister di Reino, asina mes mi a laga mi mes wordo informa ampliamente di e paisnan ultramar. Si antes mi tabata pensa mas tanto riba solo, lama y beachan bunita, awendia mi ta pensa tambe riba oportunidadnan economico”.

album album album

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter