Thursday, 27 November 2014
Hospital y Koningin Wilhelmina Fonds a presenta tremendo tayer Print E-mail
Wednesday, 13 March 2013 16:41
Comparti
DSC_2063
Un tayer cu duracion di 5 dia, a resulta di ta un exito pa esnan cu ta involvi den e cuido di pashentnan cu cancer. Esaki tabata posibel danki na e iniciativa di Koningin Wilhelmina Fonds.

 

Dr. Jaime Falconi, director medico di Hospital, a keda hopi satisfecho y gradicido na e tremendo aporte aki di e fundacion, ya cu e tur esnan cu a participa a ricibi 5 dia di tayer tocante e trato y preparacion di pashentnan cu ta haya nan mes confronta cu cancer. E tayernan tabata bon bishita no solamente door di empleadonan di Hospitaal, pero tambe a atende specialista y trahadonan social y otro personanan cu ta duna cuido y guia na esnan cu cancer.

No ta un secreto mas cu na Aruba e situacion ta alarmante y e casonan di cancer ta aumentando drasticamente, specialmente cancer di cuero, cu ta e cancer number uno, sigui pa cancer di pecho y cancer di tripa cu tambe a subi ultimamente. “E tayer aki a bin door cu nos a ripara cu tin hopi pashent confrontando e malesa aki unda e tratamento y aspecto humano mester di mas atencion, ya cu hopi medico y specialista tin dificultad pa duna e noticia aki na e pashent. Nos ta den pleno proceso caba pa mehora y paga mas tino riba e aspecto emocional di e malesa aki. Tipo di tayernan asina ta hopi importante, ya cu e ta yuda expande e experiencianan y conocemento di nos hendenan. Psicologia y cancer ta relaciona cu otro,” e director a indica.

“Na momento cu un persona ricibi e noticia impactante di cancer, nan mundo por cay den otro y e famia mester fungi como nan sosten di mas grandi, pero tambe e dokternan y enfermeranan mester ta bon prepara pa atende e pashentnan aki. Den luna di april KWF lo tin diferente charla riba prevencion di cancer, specialmente esunnan cu ta mas comun na Aruba. Un conseho na nos comunidad ta, pa nan paga tino riba nan alimentacion, ya cu esaki no ta balansa manera mester ta na e momento aki. Tambe mi ta keda enfatisa, cu cancer por ta curabel si bo ta na tempo. Cada hende conoce nan curpa, pues ora algo presenta bay bo dokter mesora. Tambe ta importante pa conoce e historia di bo famia den area medico” segun Lilian Prince.

Como orador principal, Koninging Wilhelmina Fonds a trece Dr. Carla Sno, cu traha cu e pashentnan di cancer na Italia y ta percura pa semper duna nan e capacidad pa enfrenta e malesa. El a elabora riba e temanan; con ta duna mal noticia na e moda corecto, e fase cu e pashent ta drenta aden ora e cuminsa ricib e tratamento y ora cu e cay den depresion, siña traha cu e emocionnan di e pashent y con pa anda cu e ultimo parti di e bida di e pashent, cu ta algo hopi importante.

“Cancer ta un malesa fuerte y delicado, pero semper tin posibilidad di sea cura of di biba hopi tempo. E famia ta esencial pa e pashent, pues nan mester keda fuerte y duna e pashent tur atencion y forsa cu e tin mester. Nan mester bira un mantel rond di e pashent”, asina e experto internacional a enfatisa.

Dr. Carla Sno a finalisa bisando cu ta bon pa traha hopi mas riba prevencion, duna informacion na scol y educa e populacion tocante e malesa aki.

Director di Hospital a sigui bisa cu intencion di Dr. Horacio E. Oduber ta pa bin cu mas charla asina riba diferente tereno den cuido medico pa asina sigui educa empleado y specialista na beneficio di e pashent.

dowers dowers  

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter