Saturday, 19 April 2014
Baluarte di Mahuma sra. Evarista Kelly, un hende muhe balente Print E-mail
Wednesday, 13 March 2013 19:00

cana mahuma-105

Accion di Bario ta di bishita e siman aki den e bicindario di Mahuma y como baluarte di e bario a scoge e biaha aki un hende muhe pa conmemora cu apenas siman pasa tabata Dia Internacional di Hende Muhe. Pa Prome Minister Mike Eman ta un placer di por rindi respet, honor y reconocemento na un digno hende muhe Arubiano cu henter su bida a traha duro y a lanta su famia cu e miho balor y moral cu e por a duna nan.

Sra. Evarista Kelly ta biba den e mesun cas na  Mahuma 36 caminda el a celebra su matrimonio na e edad hoben di 17 aña, e tempo aya considera algo masha normal. E ta conta cu el a yega e bario di Mahuma cinco aña prome na 1951 y na 1956 el a contrae matrimonio cu Antonio Kelly. For di e union aki cu a dura henter nan bida, a nace cinco yiu di cual dos a muri tempo nan tabata baby. Awendia Evarista ta e feliz wela di cuater nieto ya grandi.

Apesar cu su casa tabata traha den Lago y despues na Douane, Evarista y Antonio a sa di probecha di e bondad di tera. Mescos cu el a haci como mucha hunto cu su mayornan y rumannan, Sra. Evarista a planta hunto cu su famia. E cu Antonio tabata planta entre otro maishi, boonchi, pinda, batata dushi, pampuna, patia, boonchi conovis, boonchi duro, boonchi largo y haya hopi pasobra e cunucu ey na Mahuma tabata hopi fertil.

“Nos tabata planta pa cas, pa nos mes come,  no pa bende. Ora cu tabatin pinda y boonchi di mas, e ora ey tabata bay Playa cu mi ruman pa bende,” Sra. Evarista a conta. “Cuminda di cunucu mes tabata yena bo bariga.” El a sigui splica cu planta pa bo mes come tabata un trabou difícil. Por ehempel , traha un pan di maishi rabo tabata rekeri henter un proceso, pero na mesun momento tabata resulta den algo dushi, saludabel y cu hopi satisfaccion.

Sra. Evarista ta conta cu e cumindanan cu tabata come mas tanto den cas tabata concomber, boonchi, ademas di cabrito y carne pa esnan cu tabata cria bestia. Otronan cu tabata subi lama, tabata biba di pisca pa come hunto cu funchi. Sin duda algun tabata un estilo di bida mas facil, trankil y economico. Pesey mes, e ta haya hopi bon cu awendia Gobierno di Aruba ta poniendo hopi enfoke riba agricultura. Departamento di Santa Rosa, entre otro, ta duna les na e hobennan con pa planta. “Awendia bo no ta haya un yiu pa ranca un mata, corda pa planta. Nos tabata mucha muhe, pero nos no tabata worry, nos tabata traha duro,” Sra. Evarista ta comenta.

Ya un hende grandi, Sra. Evarista ta wak atras riba un bida yen di obstaculo, pero tambe yen di satisfaccion personal. Dependiendo semper di e trabou duro di su mannan, nunca su yiunan a falta cuminda riba mesa, pero tampoco un bon conseho. Esey ta algo cu Sra. Evarista lo kier sigui mira paso segun su opinion, e papel di mayornan den e formacion di un hende ta sumamente importante. “Educacion semper ta bin na prome luga. Mi kier mira pa e mama y tatanan papia hopi cu nan yiunan,” el a bisa. “Nan ta lanta sin sa kico ta bon y kico ta malo. Ta bon pa e mamanan pone bon tino, papia hopi cu nan.” Por ultimo, Sra. Evarista a comparti e pensamento cu “educacion tin cu sali di cas.”

Pa ekipo di BoBario y en particular pa Prome Minister Mike Eman ta un placer di tin e oportunidad di no solamente bishita, pero tambe expresa su palabra di reconocemento na un Señora ehemplar. Sra. Kelly sin duda ta un ciudadano ehemplar di e bario di Mahuma y un digno yiu di tera.

Comentarionan (1)Add Comment
finesse
March 13, 2013
201.229.13.217
Votes: +0
...

Prome Minister, cu tur respet, si ta den hende muhe grandi so bo por hanja e ehempel di un hende muhe cu tin balor anto e ora nos sa cu bo ta hopi leuw di cas. Mi a nota caba cu riba facebook mi a wordo manda un aviso di su excelencia cu tabata un bunita potret di un hende muhe anciano cu su excelencia tabata brasa. Cu tur tur respet, esaki di berdad ta un hende cu mester balora, pero dia di hende muhe no ta balora e grupo aki so! Den bo mesun partido tin un candidad di hende muhe fuerte, y cu ta dunando e ehempel tur dia. Ademas, mi tabata presente durante e conferencia di hende muhe siman pasa. Mas un ehempel bo no por a hanja. Asina ta, please stop cu e campanja barata aki. Buske mas serca!

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter