Thursday, 28 August 2014
Greg Peterson: Conteo nacional di Parha ta duna un analisis di e poblacion di diferente tipo di parha Print E-mail
Wednesday, 13 March 2013 20:31

Greg Peterson

Aruba Birdlife Conservation ta masha agradecido cu e cooperacion cu nan a ricibi for di Gobierno, principalmente di tres Minister cu a duna tur nan apoyo, segun Greg Peterson, na e organisacion, den e conteo nacional di parha cu ta tuma luga dia 18 di maart awor, for di 7’or pa 9’or di mainta.

Ta trata di Minister Michelle Hooyboer-Winklaar (hunto cu e team di Oficina Central di Estadistica y Parke Nacional Arikok); Minister Arthur Dowers (via Departamento di Enseñansa); Minister Mike de Meza, cu a brinda cooperacion di Servicio Postal cu lo ricibi e formularionan y percura pa nan yega CBS pa e analisis final. Segun Peterson a splica, a reparti rond di 12 mil formulario na mas cu 70 scol secundario na Aruba. ABC ta masha contento con e proceso aki ta birando, hayando mas apoyo y reconocemento. Por ehempel Oficina Central di Estadistica tin un seccion nobo cu yama “Evironmental Statistics”. E prome análisis di 2011 a wordo haci na un manera hopi cla riba un plataforma di Aruba di cuanto hende a conta. E ta kere cu si sigui di e manera aki, e informacion lo duna nan con e tendencia ta y ta permiti pa den futuro tin mas investigacion cientifico tuma luga luga. Di otro banda Peterson ta di opinion cu e conteo nacional di parha ta contribui tambe na conscientisa e poblacion di tur e parhanan cu por haya den naturalesa di Aruba y ta tempo di calidad cu famia ta pasa hunto participando den e conteo nacional di parha. ABC a traha tambe un newsletter cu a wordo reparti na 500 cas na Aruba. Nan ta papia di un documento cu ta den su fase final di analisis y cual ta e documento mas amplio, cu lo wordo publica denter di poco. E lo bay duna resultado di e prome conteo nacional, unda ta e areanan cu parha a wordo detecta, ki tipo y cuanto. Pa prome biaha den historia na Aruba ta haya un bista di e poblacion di parhanan na Aruba. ABC ta masha interesa den tur e parhanan, pero mas den e poblacion di dos parha endemico di Aruba cu ta e shoco y prikichi. E informacion cu e organisacion ta haya di tur skina ta cu e cantidad di e poblacionnan aki ta bahando y el a keda comproba tambe den e prome conteo si compare cu experiencia cu e propio miembronan di ABC tin. El a recorda cu na aña 2010 Peterson tabatin contacto cu un experto cu a bini Aruba y kende a calcula e cantidad di shoco cu tabatin na Aruba y tabata papia na 200. Den e prome conteo a sali na cla cu di e 900 pico areanan unda tabatin conteo, a conta rond 150 y pico shoco. E ta cuadra cu e calculo di e experto den pasado y ta demostra cu no tin un abundancia di shoco mas na Aruba. Tambe e patrishi ta un parha cu en general a wordo masha poco mira den e prome conteo caba. Pesey ta enfatisa cu no mester bay busca unda tin parha, pero simplemente sinta y wak cual parhanan tin den bo vecindario. Peterson tambe a ilustra e pregunta cu ta wordo haci den e formulario si nan a parti un boa, bibo of morto, for di januari pa awo den un area te na 150 meter for di nan cas.

Comentarionan (1)Add Comment
The Observer
March 15, 2013
201.229.8.223
Votes: +0
...

Lo ta hopi mas mihor si boso laga e bestianan pa pas den nomber di Dios. A trese boa Aruba cu ta come parhanan.... Tin e intenshon di pone mas molina di biento cu ta molester pa parhanan...y awor kier sinta conta ta cuanto tin. Acaso pa medio di conta ta cuanto tin, ta alimenta nan of proteha nan? Ta bai conta tambe ta cuanto pisca e sondeamento di petroleo ta bai mata? Naturalesa ta haya importancia ora ta cumbini y na e forma cu ta cumbini....of no?

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter