Friday, 19 December 2014
Dienst Huur- en Consumentenzaken ta felicita tur consumido cu: Dia Mundial di Derecho di Consumido Print E-mail
Thursday, 14 March 2013 14:01
Comparti
DSC_2063
Diabierna, 15 di Maart 2013 internacionalmente ta celebra: Dia Mundial di Derecho di Consumido. Dia 15 di maart 1962 ex presidente Mericano John F. Kennedy a bisa: “Pa definicion consumido ta inclui nos tur. Nan ta e grupo economico mas grandi, afectando y afecta pa casi tur decision economico publico y priva.

A pesar di tur cos nan ta e unico grupo importante cu nan punto di bista no ta wordo scucha”. Despues di 51 aña na Aruba, orguyosamente e consumido Arubiano por bisa cu desde inicio di Gabinete Eman por medio di Minister Michelle Hooyboer-Winklaar e consumido a haya oido.

Desde inicio di gobernacion Minister Michelle Hooyboer-Winklaar a pone como su vision pa crea un economia impulsa pa conocimiento y iniciativa empresarial. Den cuadro di su vision ela stipula y ta trahando riba dos obhetivo principal pa empodera e consumido, esta desaroya un cuadro legal moderno di proteccion na consumido y hisa concientisacion di consumido riba su derechonan.

Dia mundial di derecho di consumido ta un ocasion anual pa celebracion y solidaridad den e movimiento internacional di consumido. Participantenan ta observa e dia aki door di promove derechonan basico di tur consumido, demandando pa e derechonan aki keda respeta y protehi, y protestando riba abusonan riba mercado y inhusticianan social cu ta debilitanan.

Nacionnan Uni ta reconoce ocho derecho basico di consumido cu ta inclui e derecho pa satisfaccion di necesidadnan basico, siguridad, informacion, escohencia, wordo scucha, compensacion, educacion di consumido y ambiente saludabel. Segun e organisacion internacional di consumido e magnitud di proteccion di consumido ta amplio y ta inclui den liñanan grandi diferente situacion cu por reduci e derecho di e consumido manera entre otro productonan defectuoso, prestamonan irresponsabel duna door di banconan of te hasta servicionan di utilidad cu ta ignora keho di consumido.

E tema di Dia Mundial di Consumido pa e aña aki ta: “Husticia pa Consumido Awo!” Dienst Huur- en Consumentenzaken dichosamente por informa cu Gobierno por medio di Minister Michelle Hooyboer-Winklaar ta haciendo su maximo esfuerso pa cumpli cu esaki atraves di campaña di concientisacion, modernisacion di e servicio di Dienst Huur- en Consumentenzaken y tambe door di inicia un proyecto di ley cu lo haci posibel pa e consumido yega na su derecho mas lihe, barata y simpel.

Pues, desde 2012 Dienst Huur- en Consumentenzaken ta ofrece e servicio di proteccion na consumido completo den cual entre otro ta atende casonan individual di consumidonan. Ademas di atende casonan individual, Dienst Huur- en Consumentenzaken ta haci investigacionnan riba mercado anualmente pa sigui desaroyonan cu ta toca e consumido y explora formanan pa hisa proteccion di e consumido y mehora e servicio di Dienst Huur- en Consumentenzaken.

Por ultimo, Dienst Huur- en Consumentenzaken ta boga pa tur consumido haci uso di nan derecho mas importante cual ta nan derecho di escohe unda nan kier gasta nan placa. Si abo, como consumido, no gusta e servicio of no ta di acuerdo cu e condicionnan di compra anto bay cu bo placa cerca un otro negoshi cu mihor servicio y mihor condicionnan di compra. Pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw , “like” nos of conta un anecdota riba facebook, sigui nos via twitter of e-mail nos na info@dhc.aw">info@dhc.aw .

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter