Friday, 22 August 2014
Hobennan di De Schakel ta haya charla educativo di Prof. dr. Wubbo Ockels Print E-mail
Thursday, 14 March 2013 19:58

a

Diaranson mainta a toca turno na e alumnonan di scol secundario De Schakel pa haya un presentacion di Prof.dr. Wubbo Ockels riba sostenibilidad. Pa nan tabata un mainta interesante di por a topa cu ex astronauta Prof.dr.Wubbo Ockels ya cu nan a yega di tende hopi di dje. Su biahe transatlantico pa Aruba den su boto Ecolution tabata un topico cu a capta nan atencion masha hopi.

Ora Ockels tabata duna su presentacion, nan a sinta scucha trankil y tabata haci preguntanan al caso. Cu un video pa ilustra su charla Prof.dr. Ockels a papia un rato riba su biahe den espacio. Ockels ta e prome astronauta Hulandes y su ‘aventura’ den espacio na 1985 a haci un impacto grandi riba dje y a determina su pensamento riba varios topico pa e resto di su bida. Tirando un bista pafo di su nave espacial el a mira planeta mundo y a realisa mas ainda con vulnerabel nos planeta ta ya cu e ta wordo proteha solamente pa un capa di ozon. Un capa di ozon cu mas y mas ta wordo afecta cu tur su consecuencianan pa bida na mundo. Su pasion grandi pa yuda te na unda e por pa preserva nos planeta dor di haci uzo mas tanto posibel dor di energia berde y deshaci di petroleo, tabata un paso logico pa e cientifico tuma. Ockels a concentra su mes den busca tur clase di forma di energia alternativo y cu su proyectonan berde a hala atencion di mundo riba dje. Su autonan NUNA cu ta core riba energia solar ta un di e proyectonan aki, mescos tambe e Superbus y su boto di bela Ecolution. Na Aruba e ta papia cu e hobennan riba su movemento “Happy Energy” pa crea un miho mundo. “Mi kier mira Aruba bira un “Happy Aruba Energy”, Ockels a bisa e hobennan. Su deseo mesora a haya aprobacion. Meta di “Happy Energy” ta pa contribui na e desaroyo di un comunidad duradero dor di promove y duna informacion, pone idea y productonan disponibel na unda durabilidad ta wordo investiga, practica y realisa. Ockels a bisa e hobennan pa nan mes bin cu ideanan con nan por haci nan scol duradero. Esaki ta e futuro. Na final di e discurso educativo e hobennan mescos cu na otro scolnan a haya un ‘button’ di Happy Energy. Dr. Wubbo Ockels ta na Aruba en conneccion cu proyecto BoAruba y tin como un di su metanan pa conscientisa comunidad di e uzo di conciente di energia. Prijs di energia rond di mundo ta birando mas y mas caro y instabil cada aña. Esaki por causa hopi problema den comunidadnan cu no haci esfuersonan na tempo pa prepara pa futuro. Un di e otro metanan di e proyecto aki ta pa conscientisa hobennan y tambe generalmente tur ciudadano di e importancia di fuentenan energetico cu ta practicamente por nada y den abundancia manera biento y solo. Proyecto BoAruba ta spera di por contribui riba largo plaso riba un desaroyo sostenibel pa nos pais.

gallery1 gallery1 gallery1

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter