Prome Minister Lamothe y Minister Stéphanie Balmir Villedrouin di Haiti na Aruba

Thursday, 14 March 2013 23:05

Un delegacion basta grandi di Haiti encabesa pa Prome Minister Laurent Salvador Lamothe y Minister di Turismo Stéphanie Balmir Villedrouin a yega Aruba den un bishita di orientacion. E Gobernantenan na nan yegada a wordo ricibi door di Minister di Finanza Mike de Meza. Cu un agenda basta pisa, e dos mandatarionan a bishita Gobernador, Parlamento y finalisa e prome parti di nan bishita cerca Prome Minister Mike Eman na su oficina na Bestuurskantoor.

E tabata un ricibimento hopi cordial, unda a intercambia di pensamento un biaha mas riba e trabounan cu ta wordo haci na Haiti. Pero tambe nan a mira, durante un bishita na Expo Hall, di e cambio cu Gabinete Mike Eman ta trahando pa logra pa Aruba ta un mihor pais pa su hendenan. Den oranan di atardi e delegacion a bishita Dr. Edward Cheung Center for Innovation unda nan a haya un splicacion pa kico e centro aki ta fungi y tur e maneho berde cu Gobierno di Aruba ta trahando riba dje. Loke tabata un exito grandi tabata e encuentro di e dos mandatarionan, hunto cu Prome Minister Eman, cu e colonia Haitiano na Centro di Bario Playa Pabou, unda tur tres a wordo ricibi yen di alegria. Na momento di anuncia Prome Minister Eman, el a haya e mesun ovacion cu e mandatarionan Haitiano. Prome Minister Laurent Lamothe y Minister di Turismo Stéphanie Balmir Villedrouin a keda impresiona cu e colonia Haitiano a canta e himno di Aruba y asina yena di amor. Prome Minister Lamothe den su discurso el a bisa su compatriotanan cu nan mester ta orguyoso di e Prome Minister cu pais Aruba tin. “Orguyoso boso mester ta; Mira tur e trabou cu e ta haciendo pa e pueblo y si e ta haci esey ta pasobra e ta stima su pueblo,” Lamothe a indica. Pero tambe el a gradici e pueblo di Aruba y e colonia Haitiano inmensamente pa e colaboracion cu nan a duna cu a logra construi dos scol na Haiti. Prome Minister Eman di su banda a sigura cu e por a mira un diferencia na Haiti durante su ultimo bishita. E ta un diferencia grandi di loke el a mira tres aña pasa compara cu su reciente biahe, unda el a mira casnan cu a wordo traha. Minister Stéphanie Balmir Villedrouin di su banda a indica cu Gobierno di Haiti, mescos cu e Gobierno di Prome Minister Eman, ta traha pa pueblo y ta haci cambionan cu e pueblo por ta orguyoso di dje. Na final di e encuentro, cu a dura mas di loke a spera, tur esnan presente kier a brasa Prome Minister Eman y e mandatarionan Haitiano y gradici nan pa tur loke nan ta haciendo. Nan agenda di ayera nochi tabata un poco mas social, cu un bishita na Carubbian Festival.