Saturday, 02 August 2014
E Ultimo Capitulo Shirley Ruth Harms November 12, 1924 – March 25, 2013 Print E-mail
Monday, 01 April 2013 10:25

Shirley Harms a sirbi den WAC copy

Na aña 1938 Gobierno a anuncia cu Julianaschool ta haya ‘up-grading’ di ULO pa MULO y e prome MULO examen lo tuma lugar na 1940. Pa e muchanan cu a caba di drenta 9° klas, e prome grupo programa pa haci e examen, e cambio a trece un reto hopi dificil.

Pa nan por ta cla pa pasa examen na 1940, nan mester a completa trabou di 3 aña (of mas!) den apenas 2 aña. Pa duna un ehempel, na MULO lesnan di idioma Frances, un vak completamente nobo, normalmente ta cuminsa den 7° klas, asina ta cu e grupo aki ya a perde dos aña di un vak. Pero e grupo a acepta e reto y nan a logra caba scol cu “broche de oro”. Dia 14 di December di 1940 tur ocho a slag y nan a haya e prome diplomanan di MULO otorga na Aruba. E grupo aki tambe tin e distincion, kisas trivial, pero historico, di ta e ultimo cu a usa griffel y lei den nan prome aña na scol. Entre e ocho studiantenan aki tabata Shirley Ruth Harms kende no a ‘keda sinta’ ningun aña. Shirley a nace na Brooklyn, NY pero a bin Aruba cu apenas 4 aña. Na cuminsamento di 1942 el a bay bek Merca y a bira un ‘WAC’ den ehercito mericano. Como e tabata sa diferente idioma Shirley a haya promocion pa sergeant di 4 strepi den poco tempo. Na final di guera mundial el a bay Hapon cu e ehercito di ocupacion caminda el a siña un idioma mas. Despues el a wordo traslada pa Brazil pa sirbi den ataché militar na embahada Mericano na Rio de Janeiro y na Brasilia. Shirley tabatata un lesado voraz y por a combersa riba cualkier topico. Na edad di mas di 50 aña, Shirley a obtene su Bachelors Degree na Universidad di Connecticut den Literatura Ingles. Shirley a traha na Aruba diferente biaha, pero semper e bida na Merca tabata yam’e bek. Su lugar preferi tabata San Francisco, California caminda el a biba hopi aña. Aya el a yega di haci trabou voluntario na un hospital. Ultimo añanan el a biba na Miami, Florida caminda siman pasa el a hala su ultimo rosea. Conforme su deseonan, Shirley ta wordo crema y su shinishinan lo ser plama na laman. Sobrevivientenan di Shirley ta su rumannan Sra. Vda. Mildred (Harold), Nel, Clyde, Roy Harms y nan famia. Cu Dios Todopoderoso tuma Shirley den su Reino y dun’e paz eterno.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter