Tuesday, 30 September 2014
Minister Michelle Winklaar a start e programa aña pasa: ‘Mi ruman grandi’ a demostra di ta un exito total Print E-mail
Monday, 01 April 2013 19:07

michelle

Aña pasa Minister di Asuntonan Economico, Asuntonan Social y Cultural, Michelle Hooyboer-Winklaar a introduci e programa di ‘Mi Ruman Grandi’, cu ta un programa piloto. Cuater scol a participa den e programa y un total di 13 mucha muhe a logra drenta y experiencia e programa piloto.

“E resultado a base di e feedback di e maestronan di scol, tabata uno di sumamente exitoso y a constata cu e programa a haci un diferencia grandi di bida di e mucha muhenan aki, unda hasta nan resultado academico a refleha un exito”, e mandatario a duna di conoce. Minister Michelle Hooyboer-Winklaar tin confidencia total den e habilidad nan di nos hendenan, pa causa un impacto positivo riba nos muchanan y pone nan riba e caminda corecto. E dignatario ta pensa cu awor ta e momento ideal pa lansa e programa pa mas mucha por drenta. P’esey mes e ta haci un yamada na henter nos comunidad, specialmente esunnan cu ta dispuesto pa fungi como un ‘Ruman Grandi’ pa nos mucha muhenan. “Ora cu mucha keda leu di problema, nan ta duna miho prestacion na scol y den bida y nan comunidad ta bira mas fuerte, brindando un luga mas sigur pa biba. Cu e ayudo y sosten di nos boluntarionan, nos ta contribui pa duna nos generacion di hende muhe un oportunidad mas pa siña kico ta bon y kico ta malo y con pa tuma e decisionnan corecto. Ken no ta corda un persona cu a curasha bo pa kere den bo mes, sea na scol of na trabou. Esey ta loke e programa ta curasha; siña nos hobennan pone e metanan grandi pa scol, mehora nan confidencia den nan mes y yuda nan pa tin un relacion miho y fuerte cu nan famia”. E meta general di e programa aki ta pa introduci e mucha muhenan hoben entre 10-13 aña na e damanan profesional di 25 aña en adelante. E mucha muhenan den e programa ta identifica pa nan scol, como mucha cu tin mester un poco guia extra, pa por logra yega nan potencial maximo den nan bida. E dama profesional aki ta bira un ‘role model’ den nan bida, door di yuda e mucha muhenan aki pa e miho cu nan por ta, nan tin menos riesgo di cay den e trampanan di bida. Asina por yuda nan desaroya e hermentnan pa bira un adulto bon adapta y orienta pa enfoca pa duna bek na nan famia y comunidad en general. E responsabilidad di e ‘Ruman Grandi’ ta pa nan ta interesa den desaroya un amistad positivo cu e hobencita, bira un persona di confidencia p’e y tin suficiente energia pa haci actividadnan hunto. Un persona cu ta madura, hibando un bida stabiel, tin pasenshi y ta respetuoso na su mes y otro. E ‘Ruman Grandi’ aki mester ta dispuesto pa inverti por lo menos 6 ora pa luna, pasando tempo di calidad cu e hobencita y duna sosten total y no ta critico den su interaccion cu e hobencita y actua cu integridad semper. E mayornan di e hobencita cu drenta den e programa aki, mester duna nan consentimento skirbi, cu nan yiu mag di participa na e programa aki. E mayornan hunto cu e ‘Ruman Grandi’ mester yega na un areglo, tocante cua ta e miho dia y ora pa e salimento. E ‘Ruman Grandi’ no ta kita e responsabilidad di e mayornan, e ta e mentor y tampoco e ta fungi como un ‘baby sitter’ p’e mayornan. E ‘Ruman Grandi’ no t’ey tampoco pa duna sosten financiero na e famia. Mas cu claro, e ‘Ruman Chikito’ en cuestion tambe cierto responsabilidad cu e mester tene cuenta cu ne, na momento cu e wordo apunta pa drenta den e programa. E comportacion di dje ta uno di ta respetuoso cu su ‘Ruman Grandi’ tur momento ora cu nan ta hunto. E mandatario ta contento pa anuncia cu e di dos fase di e programa di ‘Mi Ruman Grandi’, lo inclui e mucha homber nan tambe. Tipo di programa asina ta masha conoci rond mundo y Aruba no mester ta un excepcion, mirando cu tin potencial den nos hendenan pa causa un impacto positivo riba nos muchanan, brindando nan e potencia pa ta exitoso, unda cu nan por crece den un adulto cu miho futuro yena di potencial. Pa mas informacion con abo tambe por participa y ta un ‘Ruman Grandi’, por tuma contacto libremente cu CEDEHM na 588-1391.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter