Saturday, 29 November 2014
Minister di Labor Otmar Oduber ta pone enfasis cu no por pone un trahador disponibel pa mas cu 12 luna Print E-mail
Monday, 15 April 2013 19:18
Comparti

Otmar Oduber006

Minister di Labor Otmar Oduber ta introduci cu e cambionan di ley pa loke ta trahador temporal un sistema completamente nobo pa tur ‘uitzendbureau’ na Aruba. Motibo principal pa a bin cu e cambio aki ta cu e ley riba trahadornan temporal ta un ley cu mester a wordo introduci basta tempo caba aki na Aruba.

Mirando cu e fenomeno di trahador temporal ta aumenta na gran escala, unda cu e sistema aki ta uno sumamente flexible pa ‘uitzendbureau’ y e ‘inlener’. Sin laga afor cu esaki ta un negoshi lucrativo. Sinenbargo pa e trahador temporal e situacion cu e tabata traha aden te cu 1 di april 2013, esaki tabata uno desventahoso. Cu e cambio y introduccion di e ley aki Minister Oduber ta boga pa brinda e trahador temporal un mehoracion pa por tin un trabou fiho como tambe siguransa riba un salario. Un cambio hopi grandi cu e ley aki ta trece cu ne ta cu e contrato laboral temporal (‘uitzendovereenkomst’) ta wordo considera un contrato laboral y e trahador por goza di tur proteccion cu e leynan laboral ta ofrece. E ley aki ta portehe e trahador temporal pa wordo haci disponibel na un tercera persona pa un tempo indefini, sin cu e tin perspectiva riba un trabou ‘vast’. Entrante 1 di juli 2013 un trahador temporal no por wordo poni disponibel pa labora den mes un compania, den mes un funcion pa mas di 12 luna, Minister Otmar Oduber ta splica. Den un caso unda cu e trahador temporal wordo reemplaza prome cu e 12 lunanan, e ‘uitzendbureau’ por pone un otro empleado na e mes un posicion pa fungi den e funcion aki terminando e lunanan cu falta pa completa e 12 luna total. Por ehempel si e prome trahador a traha 6 luna so, e di dos empleado lo por traha e ora ey e resto di 6 luna. Esaki ta e caso tambe si ta un otro uitzendbureau ta prove e tercera persona cu un trahador temporal (art.5 ley riba trahadornan temporal). E mandatario ta indica cu si despues di e periodo aki e compania ainda tin mester di un trahador pa e funcion en cuestion, e compania aki lo mester tuma e trahador temporal den servicio directo pa tempo defini of indefini. Si e compania no haci esaki, e vacatura lo mester keda bashi como no ta posibel pa pone un otro trahador temporal den e funcion aki mas. Si despues di un aña ainda e compania aki mester di un empleado pa e funcion aki, esaki ta significa cu aki ta trata di un trabou fiho y no tin un trabou temporal. Den un caso asina e tercera persona no por haci uso di un trahador temporal mas. Cu e introduccion di e ley aki Minister di Labor ta reenforza cu trahadornan temporal merece disfruta di tur proteccion di leynan laboral. Esaki ta pa asina aki trahadornan temporal por yega na un trabou fiho y stabilidad economico.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter