Saturday, 20 December 2014
Anselmo Pontilius relaciona cu caso STA na Westin: Mediador di Gobierno ta simplemente cumpli cu ley Print E-mail
Monday, 15 April 2013 22:05
Comparti

Anselmo Pontilius

E Sindicato STA ta rabia pasobra ainda no por logra yega na un referendum pa cierto departamentonan na e hotel Westin, siendo cu nan tin firma di un cantidad grandi di trahadonan. Mester corda cu e hotel aki tin su mesun sindicato “inhouse” cu a wordo lanta algun aña atras. Den combersacion cu Mediador di Gobierno Anselmo Pontilius, el a splica cu e por compronde e decepcion di STA cu for di aña pasa ta trata di haya un referendum na e hotel.

Mediador a recorda cu Westin na dos ocasion a bay Corte y Hues a para e proceso di referendum y su persona no por haci nada otro cu cumpli cu ley. “Nos mester respeta sentencianan di Hues,” el a bisa. Den e di tres intento, dia 11 di februari ultimo, STA a manda un carta di miembrecia pa Mediador, cu 181 firma. Pa tal motibo ta pidi un referendum. Pontilius a splica cu e proceso siguiente ta cu Mediador di Gobierno mester publica cu ta bay tuma luga un referendum y atrobe e dunado di trabou a bay Corte riba cual caso un decision a wordo tuma dia 26 di maart ultimo. Hues na e ocasion ey a bisa cu loke Mediador a haci tabata corecto, esta publica e referendum. Dia 28 di maart el a reuni cu e dunador di trabou Westin, pa informa nan cu e proceso ta sigui riba cual a haya e reaccion cu si esey tuma luga, nan ta bay Corte. Mediador a sigui cu e proceso unda a reuni cu e sindicato TEAM, esun inhouse, y STA, dunando nan detaye di e ley. Esaki ta nifica cu sindicato TEAM ta participa automaticamente. Den e proceso di votacion, a investiga cu tin 354 trahado cu por vota, mientras cu STA a entrega 181 formulario di miembrecia. Tabatin mas o menos 20 formulario cu no tabatin firma, y esakinan a wordo manda bek pa e wordo firma debidamente. E sindicato a haci un coreccion y na final a resulta cu nan tabatin 194 formulario. Den esaki a constata cu tabatin 10 cu no tin firma y 5 trahado no tabata den servicio mas di Westin, y 6 trahado a entrega un carta bisando cu nan firma no por wordo uza den e proceso pa un referendum. Despues di e analisis aki, a combersa cu e dirigentenan pa nan bolbe revisa tur e formulario. Despues di e reunion, STA a entrega 183 formulario di cual un tabata dobel; y tres trahado cu a aparece como miembro pero no por participa den e referendum ya cu nan ta parti di gerencia. Pero tambe tabatin algun trahado cu a bisa cu nan ta miembro pero no por uza nan firma pa pidi referendum. Mediador di Gobierno debi na e situacion aki, a bay den consulta cu su Abogado, na final a conclui cu mester convoca e referendum cu a wordo yama pa diabierna siman pasa. Pontilius a splica cu nan a haya un carta di sindicato STA cu ta reclamando nan derecho y a informa nan por escrito, ayera, cu nan no tin e mayoria cu ta wordo exigi door di ley. STA mesora a contesta cu si nan no wordo inclui den e votacion, lo bay Corte. Sinembargo a informa nan tur loke a wordo haci legalmente, y cu ta keda nan derecho pa bay Corte si nan kier haci esey. Finalmente e referendum a wordo yama pa dia 3 di mei y a pone e sindicato TEAM como unico sindicato. E Mediador a enfatisa cu nan oficina ta simplemente cumpli cu ley y si Corte ordena cu STA mester wordo inclui, si e caso bay Corte, lo cumpli cu esaki tambe. “Ley tey y Mediador mester cumpli cu nan. Tin biaha tin e impresion cu Mediador ta interpreta e ley manera e kier, pero esey no por pasobra e ley ta splica bon cla kico por wordo aplica y kico no.” Mientrastanto, Westin a informa Mediador cu apesar cu ta un sindicato so, esun interno, ta participando den e referendum, nan lo sigui cu e caso den Corte pa para e proceso aki. Esaki pasobra nan ta di opinion cu e referendum aki por tuma luga aki seis luna, ya cu dos luna pasa caba a yama un referendum, cu no a sigui. Esaki tabata relaciona cu un referendum pa departamentonan na e hotel y no den e propiedad completo. Awor Westin tambe a hiba mediador corte pa asina para e referendum cu TEAM pasobra nan no ta kere cu mester tene referendum si TEAM tey den cas caba. Esaki mester tuma lugar prome cu 3 di Mei.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter